Michael Owen chuan tun season-ah harsatna eng emaw zat hmachhawn mah se Liverpool chu Premier League-a team tha ber an nih thu sawiin Arsenal chuan nikuma Arne Slot-a naute thatna kha an hnaih pha lo hle niin a sawi.
Liverpool hian 2025-26 season-ah league nomawi an kawl mek chu humhim tumin tan la viau mah se an tan humhim ngaihna awm tawh lo tluk a ni a. Tunah hian parukna ni mekin khelh tur pakua la awmah hmahruaitu Arsenal aiin point 19-in an hniam zawk mek a ni.
Liverpool leh England tana player pawimawh ni thin, Owen-a chuan Liverpool hi an khelh that ni chuan a tha chungchuang ber an la nih reng thu a sawi.
Ballon d’Or lo dawng tawh striker chuan Liverpool chungchang sawiin, “Ka ngaihdanah chuan Premier League team tha ber chu Arsenal ni lovin Liverpool an ni,” a ti.
“Mite chuan ‘parukna chauh an ni’ tiin min nuihzat mai thei. Mahse, season hmasaah khan league hi hneh takin an thunun a, tunah hian an khel tha tawk lo mai a ni. Mahse, Premier League-a team tinte hi an khelh that ber lai vekin han khaikhin ta ila, Liverpool hi an tha ber ang tih ka ring,” a ti bawk.
A sawi zelnaah, “Tunah hian an tlahniam ta viau hi chu awih a harsa hle. Mahse, hun rei a ni lo ang, season thar velah chuan an thatna vawrtawp kha an rawn thleng leh ngei ang tih ka ring,” a ti bawk.
Arsenal chu hmahruaitu niin point kuain Manchester City aiin an sang zawk a, khelh khatin City hian an khel tlem zawk thung.
Mikel Arteta naute hian tun season-ah corner atangin goal 16 lai an khung tawh a, chutiang bawkin an tlar hnung pawh a phuiin a khauh hle a, an khelh dan sawiseltu an tam hle.
Owen chuan, “Arsenal hi league champion an nih tho chu ka ring,” a ti tho a ni.