Aizawl: Dinthar atanga Tuikual South inkara Tuikual lui leh a hrula kawr siam leh a chunga lirthei tlan theihna siamna tur, Aizawl West Outlet Project chu Nilaini khan UD&PA Minister K. Sapdanga’n a khuh hawng.
Khuh hawnna inkhawmah K. Sapdanga chuan, khawtlang thawhhona tha tak avang leh mi mal thenkhat, an chenna in thiah then ngai hial te bakah, ram pek ngai ten phal taka an pek avanga he hna hi tan theih tur a peih a lo ni ta chu lawmawm a tih thu a sawi a. UD&PA hmalakna hrang hrang lungphum leh hna zawh tawh hawn te tun hnaiah an ngah thu sawiin, heng hna hrang hrang hlawhtlinna atan hian sorkar lai mai bakah, hun hmasa lama hruaitu hmasaten hmathlir an lo neih that zar te pawh an zo tih a sawi bawk.
Khual zahawm bialtu MLA leh Minister of State ni bawk Lalnghinglova Hmar chuan, Aizawl West Outlet Project atana sum an neih chuan helai hna pum hi a daih dawn loh avangin, kawng hi laklawh deuhin a tawp dawn a, chumi chhunzawmna atan chuan UD&PA in Storm Drain Project an neih nena tangkawpin siam a ni dawn tih a sawi a. He kawng hian chetvel awlsam phah nan te, rikrum thilah pawh rang taka han chet vel nan a tangkai dawn hle tih a sawi.
He hna hi SASCI atanga thawh tur a ni a. Project pahnih kaih kawp niin Rs vbc 30.96 senna a ni dawn a. RCC hmangin drain tha tak siam tur niin, chumi chungah chuan metre lia zau lirthei tlanna tur leh metre 1.5-a zau footpath te siam tur a ni a, a vaiin 1.68 km-a thui a ni dawn a ni.