Sethawn-a ruihhlo ngaite enkawlna hmun, Jordan Center chu sorkarin Mizoram Synod kuta a hlan fel.
Nilaini chawhnu khan Social Welfare, Women & Child Development department Minister Lalrinpuii hovin a pisaah center chu Synod kuta hlanna tur inremna (Memorandum of Agreement) chu ziah fel a ni a. Inremnaah hian Commissioner & Secretary, Social Welfare, Women & Child Development Lalzarmawii leh Rev. John Raldosanga, Moderator, Mizoram Synod ten hming an ziak hnan.
Hriatpuituah sorkar atangin Zonunthari, Joint Secretary, SW&WCD leh Caroline Hmingthanzuali, Joint Director, Social Welfare ten an hming a ziak a, Synod aiawhin Rev VL Luaia Hranleh, Sr. Executive Secretary leh Rev. Dr. K.Lallawmzuala, Executive Secretary ten an hming an ziak bawk.
Inremna ang chuan center hi Mizoram Synod enkawl turin kum 15 atan hlan a ni phawt ang a. Kum tin sorkarin tanpuina (Grants-in-Aid) Rs nuai 50 a pe ang a, kum 2 danah zaa 5 a tihpun thin tur a ni dawn a. He hmunhma hi ruihhlo avanga harsatna tuarte tan De-Addiction emaw, After Care emaw anga kalpui tur a ni dawn a ni.