Mizoram State Election Commissioner (SEC) Dr. H Lalthlangliana’n Aizawl Municipal Corporation (AMC) inthlan hun a puang a. Inthlan hun puan a nih atangin AMC huam chhungah Model Code of Conduct hman nghal a ni.
Nilaini chhun khan a pisa-ah thu thar lakhawmtute hmaah SEC hian April 21-ah AMC inthlan a nih tur thu a puang.
Dr. H Lalthlangliana sawi danin AMC inthlan ni April 21 hian zing dar 7 atanga tlai dar 4 thleng vote thlak a ni ang a. Inthlan chuh tumte tan March 25 thleng hming pek luh theih niin vote tlate chu April 26 zing dar 8 atangin chhiar tur a ni.
Inthlan chuh tumte tan March 25 tlai dar 3 thleng hming pek luh theih a ni a, hming pek luhte chu March ni 27-ah endik a ni ang a. Inhnukdawk duh tan March ni 30 thleng hun hawn a ni ang.
Dr. H. Lalthlangliana chuan inthlan an puan tlai hret chhan chu a hma atangin a kal dik lo va, assembly session nen a inrual thin leh bichilh lutuk thin chu hma lam hun lo kal zel tur atana siam rem thain a hria a, tuang tichhahin a siam fel theih laia siam felin sawisel pawh pawi ti lovin, tuna huaisen taka an kal chuan a lehpek zelah harsatna an tawh lohna tur a ni a. Tuna an tihtlai hlek hian nakkin zelah harsatna awm lovin an kal theih phah dawn tih a sawi.
Dr H Lalthlangliana chuan AMC inthlan hun atan hian political party-te pawhin thu rawn an pe ang, SEC chuan political party-te hnenah thurawnte pawh a la ang. SEC chuan tha ber tura a hriat angin a kal mai a, SEC chu party duh dan anga kal tur a ni lo va, SEC chu thutlukna siamtu tur niin a duh dan anga kal mai tur zawk tih a sawi.
Inthlan puan a nih tak avang hian AMC huam chhungah election model code of conduct hman nghal niin Dr. H Lalthlangliana chuan MCC chu sorkar hnathawh kal lai tih thuanawp leh tihbahlahna tur atana siam a nih loh thu a sawi a. Sorkar hna leh hmasawnnate kal reng chung si-a political party tin, sorkar lai leh opposition lamte pawhin tanhmun inang neia inthlan an hmachhawn theih nan te, sorkar bungraw hmanga sorkarna chelh mektu party-in an party tana tan hmun remchang bik an insiam loh nante-a siam a nih thu a sawi.
AMC inthlanpuiah hian ward 19 a awm a, heng zinga seat paruk hi hmeichhe bial a ni dawn a ni.
AMC inthlanpui atan hian Indian National Congress (INC) leh Mizo National Front (MNF) chuan an candidate an lo puang tawh a. State-a sorkarna chelhtu, Zoram People’s Movement (ZPM)-in March 23, 2026-ah an puang thung ang.