Chelsea winger Pedro Neto chu Arsenal laka a chet dan mawi lo avangin inkhel vawi khat khel thei lo turin hrem a ni.
Neto hi reilo te chhungin yellow card vawi hnih hmuin hnawh chhuah a ni a. Khelmual atanga a chhuah dan mawi lo leh match official-te laka tawngkam chhe tak a hman avanga he hremna hi pek a ni.
FA thupuangtu chuan, “Pedro Neto chu inkhel vawi khat chawl tur leh £70,000 chawi turin hrem a ni. Hei hi Pathianni, March 1-a Chelsea leh Arsenal te Premier League-a an inkhelh laia a chet dan mawi loh vang a ni,” a ti.
“Minute 70-naa hnawh chhuah a nih hnuah khelmual atanga chhuak nghal mai loa a awm khawtlai vang leh match official-te laka tawngkam mawi lo a hman vangin thiam lohna lian tak a nei a. Pedro Neto pawhin thubuai an siamsak hi a pawm nghal a, Regulatory Commission chuan thutlukna siamin he hremna hi an pe ta a ni,” a ti bawk.
Tun season-ah Chelsea player hrang hrang pakua laiin red card an hmu tawh a, hei hian an team discipline a that tawk lohzia a lantir a. Manager Liam Rosenior-a tan pawh a player-te nungchang thunun kawngah harsatna lian tak a ni mek.
Neto hian kar laihawla Paris Saint-Germain an hmachhawn tumin ball boy pakhat a nem bawk a. UEFA chuan he thil hi an enfiah mek a, hremna dang a hmuh belh leh phah mai thei a ni.
Rosenior chuan, “Thil thleng kha ka ennawn tawh a, a lan danah chuan a mawi lo hle mai. Mahse, Pedro thil duh dan kha chu ka hrethiam a ni. Ball kha rang taka lak let kha a duh a ni,” a ti.