Chelsea captain Reece James chuan Stamford Bridge-a kum 2032 thleng cham turin kum ruk chhung atan contract thar a ziak a, he thutlukna siam hi a tan thil harsa a nih loh thu a sawi bawk.
Kum 26 mi, James-a hi kum ruk a nih atangin Chelsea-ah hian a lo awm tawh a, kum 2023 khan captain-ah hian hlan kai a ni.
A contract hman mek hi kum 2028-a tawp tur a ni a; mahse, Chelsea hian a contract tawp lam thlen hma leh Antonio Rüdiger leh Andreas Christensen ten man awm lova Real Madrid leh Barcelona an pan ang kha a thlen ve loh nan hma an la a ni.
James-a hi Chelsea tan vawi 225 a inlan tawh a, kum 2021-a Uefa Champions League nomawi an lak tum leh nikum nipui laia Fifa Club World Cup an lak tum khan player pawimawh tak a ni.
Contract thar a ziah chungchangah James chuan, “Thutlukna siam a harsa lo khawp mai. He club-ah hian ka sei lian a, ka hmangaih a ni. Hetah hian hlawhtlinna ka lo nei tawh a, nakin zelah pawh hlawhtlinna tam zawk kan neih leh ka ring tlat a ni,” a ti.
“Club thuneitute atanga thawk dangte thlengin ka be vek a, an hmachhawp leh kan thil din tum hi ka thlawp tlat a. Player thar lak luh chungchangte chu ka sawi pha lo ang a; mahse, club hmachhawp leh ka duhthusam a inmil em tih erawh hriat chian ka duh a ni,” a ti bawk.
“Mi tin hian hnehna chan hi kan tum ber a ni a. He club-a ka awm chhung hian kum tin nomawi kan la thin a, chutiang zel chu kan la tum dawn a ni,” tiin a sawi belh bawk.
James hian March, 2017 khan a professional contract hmasa ber a ziak a, Academy Player of the Season-a thlan a nih bakah Youth FA Cup-ah a team-te a hruai a ni.
Chelsea a chhuahsan ve chhun chu Wigan-a loan-a a khelh kha a ni a. Hetah hian midfield-ah khel hnem mah se a che tha hle a, club player of the season-ah an thlang nghe nghe a ni.
2019/20 season hmaa Cobham-a a kir leh hnuin James hi Chelsea tana player pawimawh tak a ni chhunzawm a. Hliam vanga a buai thin hnuah Enzo Maresca leh Liam Rosenior te hnuaiah player rinrawl a ni a, a duhna ber right back leh midfield-ah a khel thin a ni.