Aizawl: Ningani khan Gauhati High Court, Aizawl Bench chuan Mahindra car loan Rs. vbc 150 vel tihchingpen thubuaia District & Sessions Judge, Aizawl-in anticipatory bail dilna, Bail Application No. 28/2024-a bail phalna a lo pek tawh thiah dilna chu a ngaihtuah leh a. He thubuai hi Justice Sanjeev Kumar Sharma thutna bench-ah ngaihtuah a ni.
Mahindra thubuai kaihhnawiha petition hrang hrang thehluhte chu a ruala ngaihtuah a ni.
Anticipatory Bail order May 27, 2024-a thiah dilna chungchangah hian hnialna thehluh a nih tawh thu court-ah thlen a ni a. He thubuaia hi chawlhkar li hnu, April 20, 2026 emaw atanga ngaihtuah leh tura dah a ni a. Thubuai ngaihthuah leh ni hian hearing neih a ni ang.
Court chuan affidavit la thehluh lohte chu hearing neih hma ni thum la awmah thehlut fel vek turin a hriattir bawk.
Mahindra hian March 29, 2024 khan Crime and Economic Offences Police Station-ah car loan tihchingpen chungchangah hian FIR an thehlut a, thubuai case no.3/2024 chu section 34/120B/408/419/466/467/468/471/472/477A IPC hnuaiah ziah luh a ni a. He thubuaia motor dealer, Paul Zothanpuia chuan anticipatory bail hi dilin District & Session Judge hian a dilna phalsakna order chu May 27, 2024 khan a chhuah a. Mahindra hian Section 439(2) r/w Section 482 CrPC, 1973 hnuaiah he order May 27, 2024 hi high court-ah thiah dilna an thehlut ta a ni.
He thubuai hi ni June 20, 2024 atangin ngaihtuah tan a ni a, kum hnih chuang kalpui a nih tawh thu Supreme Court-a Advocate on Record hna thawktu, JC Lalnunsanga’n a website-ah a tar lang.