Chief Minister Lalduhoma’n Zofate huikhawma a tul anga tanpui zel chu sorkar duh dan leh kal dan a nih thu a sawi.
Ningani-a Ronpur, Assam-a Thangram Indigenous People’s Movement leh MZP General Headquarters tangkawp buatsaih Thangram Cultural Meet 2026-ah khuallian, chief minister chuan ramriin daidan mah se hnam ri chu kham theih a ni lo va. Ram hranah te, state hranah te awm mah se unau an nihnate leh hnam khat an nihna te uar taka an lantir a ngai tih a sawi.
Inpumkhatna lama hmalakna kawngah Thangram mipuite an thawhhlawk hle tih sawiin chief minister chuan, “Inunau, tanpui ngaite tana vehbur in khawn dan te, press release siama in unaute thlavang in rawn hauh thin dan te pawh kan lo hre ve zel a. In chungah Mizoram mipuite pawh kan lawm a. Kan hnam huikhawmtu lian leh tangkai YMA te, MZP te leh kohhran te, kan tlawmngai pawl dangte kaltlangin nghet takin invuan tawn zel ang u,” tiin, Zofate huikhawma a tul anga tanpui zel hi sorkar duh dan leh kal dan a nih thu a sawi.
Chief minister chuan khawvel huapa inhuikhawmna tur, Mizo Diaspora Cell chu CM office-ah an din tawh a, hna pawh an thawk nasa a, mi tam tak an tanpui tawh a. Chutiang rilru putu sorkar chuan Thangrama an unaute pawh a ngaihthah ngai dawn lo tih sawiin, “In tana dan hnuaia tih theih kan neihte chu kan ti zel dawn a. Fahrahin kan kalsan lo vang che u,” a ti.
Tun hnaiah thenawma Zofate delh chin ramah harsatna a thleng hlawm a. Heng, an chunga harsatna lo thlengte hi Pathian remruatna anga lo thleng, an thatna tura a rawn tirh a ni lo vang tih an sawi thei lo tih sawiin Lalduhoma chuan, “Engkim ti thei kan Pathianin hna a thawh chuan theih loh reng reng hi a awm lo a ni. Chuvang chuan, a malsawmna kan dawn theih nan, ‘a ram leh a felna’ zawng zel ang u,” a ti bawk.
Thangram Indigenous People’s Movement President K. Vana Chorei pawhin thu sawiin Mizoram chief minister-in an ram a tlawh chu a ropuiin ram hruaitu lianin an tlawh an la hre ngai lo tih a sawiin, an ram tana ni chhinchhiahtlak a tling tih a sawi.
MZP Vice President Sanghmingthanga kaihhruai inkhawmah hian MZP President Dr. C. Lalremruata chuan Thangrama Zofa awm hnam peng hrang hrangte hi an inlungrual a, an tanrual a tul takzeta politic-ah pawh hlauhawm tham ni tura thukhat vuaa an awm a tul tih a sawi a. MZP chuan Zofate hi rorelna pakhat hnuaiah an la awm an ring tlat tih a sawi bawk.
Thangram tih hi khawthlang ram (Thlang ram) tihna a ni a. Mizo thlang tla hmasate luah ram niin tunah hian khaw 24 vel leh mihring 30,000 vel an awm mek a. Heng rama cheng Zo hnahthlak hnam parukte hian Thangram Indigenous People’s Movement dinin kawng hrang hrangin hma an la mek a ni.