Mizo hnahthlak zinga rimawi tum thiam (band) hmingthang leh hlun tak, Zofate chanchina musical band hmasa, rimawi lama Zofate sulsutu ZODI band-a an singer Lalhlunmawii a thi.
Lalhlunmawii (68) hi Kal lam natna avangin March ni 20, 2026 chhun dar 12 khan Tahan-ah a thi a. A ruang hi Sangthanga [fam] in, Mission veng, Tahan-ah lak a ni.
Thangthar zawkte hi chuan ZODI singer Lalhlunmawii hi kan hre tawh meuh lo mai thei. Ani hi Mizo music khawvela hmeichhe aw hmang thiam tak a ni a. ZODI band-in an hlawhtlinna vawrtawp an thlen laia an zinga tel reng thin a ni.
ZODI band-ah hian vocalist hmingthang tak tak an awm thin a, an zinga lar zual chu Thanghlira (vanduatthlak takin min lo boral san tawh) leh Lalhlunmawii te an ni.
Lalhlunmawii hi ZODI (Zodi Rimawi Pawl) original lineup-a hmeichhe vocalist zinga mi a ni. An band hlawhtlinna hmahruai album hrang hrangah a aw mawi tak hi hriat tur a awm thin a, mipa zaimi hmingthang Thangluaia leh Thanghlira te nen pawh hla tam tak an thun ho a ni.
ZODI album hmasa leh hmingthang ber pawl Phengpheleng leh Rosepar (1980)-ah khan a zai nasa hle a. Thangluaia nena an sak dun ‘I pen zel ang’ tih te, ‘Engan kan intawn’ tihte, Band hming chawi album-a hla hmingthang tak ‘Damlai pialral’ tih hla te, Lalrodinga (Pa Dinga) hla phuah ‘Chun leh Zua’ tihte chu a lar pui thin hle.
Lalhlunmawii hi a hun lai chuan hmeichhe zaimi zinga ‘soprano’ thiam leh aw zângkhai tak nei a ni a. Zodi band-in ‘Electric’ rimawi an hman tan tirh khan, a aw hian an music kha a ti mawi zual hle. Lengzem hla mai bakah, Pathian fakna hla (Gospel) lamah pawh sulhnu tam tak a nei.
ZODI hi Tahan, Myanmar (Burma) atanga rawn chhuak an ni a. Mizo hnahthlak zinga ‘Electric guitar’ leh ‘Keyboard’ nung taka hmang thiam hmasa pawl an ni. Kum 1980-ah an album hmasa ber ‘Phengpheleng leh Rosepar’ an tichhuak a, hemi hnu hian Mizo lengzem hla leh Pathian fakna hla (Gospel)-ah sulhnu tam tak an hnutchhiah a ni.