Democracy rama hmun pawimawh ber chu rorelna in, Parliament House leh Assembly house te hi an ni a. Hemi hmuna an rorel azirin ram chu a kal a, hemi hmuna roreltute azirin ram nihphung a innghat a ni. Chuvangin kan ramah pawh kan hmun pawimawh ber chu kan assembly house hi a ni a, kan hotu hmasate khan he hmun rorelna pawimawhzia hriain an rorel lai pawh mipui hmuh theihin, TV ah live in an pe chhuak ta a ni.
Assembly house hi a pawimawh em avangin a hmun pawh vawn zahawm a ngai a. A chhunga rorel lai pawh zahawm taka an nun a ngai. Mawi taka khawsa tura beisei an ni. Hun kal tawhah kan ram hruaitute chuan he house vawng zahawm tur hian nasa takin tan an lo la tawh thin a, a bik takin he house vawn zahawmnaah hian a kaihruaitu assembly speaker in mawh a phur lian em em a ni.
He hmun pawimawh vawn zahawm kawngah kan speaker a tal buai ta deuh nge ni, tun assembly budget session-ah khan kan tih dan pangngaia live a pekchhuah tih tawp lam a sawi ri ta hial mai. He thil hi ngaihtuah chian a ngai hle.
Kan ram rorelna a kan hotu thlan lalte rorel lai chu mipui hmuh tlak lohah a ngai ta em ni. Kan thlan lal te hian he house a an tih tur tha tak a an hlen a, mawi taka nungchang an tihlanna tur hmunah hian an sapatal ta deuh em ni? Speaker chairman-na pawh ngaihtuah meuh lovin, mahni duh dan danin an dingin an in au buai mai ni ta te hian a lan chang a tam mai. Committee pangngaiah pawh thu kan sawi dawnin ‘Pu Chairman’ tiin zahna kan lantir thin a ni ngai a. Rawn pasawntlung chawr tawp a, mi thusawi lai rawn hnial ta pawp pawp mai lah hmuh tur an tam. Member dangte zah entirnan an hminga ko lovin chumi bialtu member zahawm tak tiin an in ko thin kha ania. Tunah zet chuan khawlaia inkoh dan pangngaiin an in au bawl bawl maite hi anmahni ngei zahawmna hliahkhuhtu zawk a ni.
Assembly house hian dan leh dun, kalphung fel tak, committee chi hrang hrang siam dan turte a nei vek a. Dan te hi member te pawhin an zirin an thiam ngei tura ngaih an ni. Mahse dan en lem lovin an duh danin an kal mai chang te pawh a awm bawk.
Kan assembly speaker in house rorel lai live telecast loh a sawi hi ti hlawhtling lo hram se. Member te pawh inngaihtuah chiangin he house zahawmna vawnghim tur hian tan la leh teh se. Dan pawimawhna hre tur rual an ni tlat. Chu chu kan ram zahawmna a ni si a.