FIFA chuan Israeli Football Association (IFA) chu inthliarna do kawnga an mawhphurhna an hlen loh vangin Ninganiah khan an hrem a, $190,700 an chawitir.
Disciplinary Committee report chuan, ‘Beitar Jerusalem’ club-in chi leh chi inthliarna lama chet dan mawi lo tak an lantir fo chungchangah IFA hian hma a la tawk lo hle tih an tar lang a ni.
October, 2024 khan Palestine Football Association chuan IFA laka inthliarna chungchang hi FIFA-ah an lo thlen tawh a, chumi hnuah FIFA hian chhui hna an thawk tan a ni.
Palestine FA hian IFA hi suspend ngei turin dil mah se FIFA chuan he ngenna hi an hmang ta lo hlauh thung.
Disciplinary Committee thutlukna tar lanah chuan IFA hian FIFA kalphung leh thil tumte an zawm lo tih hmuh chhuah a ni a, Israeli football-a chi leh chi inthliarna thleng hrang hrangte pawh tar lan a ni a. Committee chuan Beitar club laka hremna an lo pek tawh thinte chu a tawk lo hle tih an sawi.
“Club-in ‘forever pure’ (thianghlim reng) tih thupui an hman leh Arab player-te laka ‘terrorist’ (firfiak) tia au khum nawn fote hi infiamna hmingchhiatna thlentu leh nungchang mawi lo tak a ni,” an ti.