Aizawl: Govt. Aizawl College hnuaia Research, Innovation & Extension Cell chuan nimin khan Aizawl khawpui faina chungchanga inrawnkhawmna, ‘Consultation on Clean Aizawl: Urban Cleanliness and Visitor Management’ tih hmangin an buatsaih.
He hun hi Prof. Vanlalringa Bawitlung-in kaihruaiin, College Principal Lalbiakzuala’n inlawmna thu a sawi.
He inrawnkhawmnaah hian V Lalruatliana, Dy CEO, Aizawl Smart City Ltd chu keynote speaker niin Aizawl khawpui faina lama kan hmasawna hrang hrangte sawiin, tan lakna tur hrang hrangte a sawi bawk a. Aizawl khawpui a fai chuan khawpui dang pawh hi a fai chho zel thei a ni tiin nasa lehzuala faina lama hma la turin a fuih.
Inrawnkhawmnaah hian research institute, media, social activist leh academic institute atangin Rochamliana, Secretary MIAS, Lalnuntawma, Zonet (Media), Vanramchhuangi, activist & environmentalist leh Dr Vanramliana, Asso. Professor, PUC ten an telpui thei a. Sawiho hun hi Dr C Lalengkima, Asst. Professor, GAC-in a kaihruai a ni.