Aizawl: Public Health Engineering (PHE) Department leh Central YMA te huaihawtin, khawvel puma tui pawimawhna inzirtirna ni ‘World Water Day’ chu nimin khan Dawrpui Multipurpose Hall-ah hman niin, tui renchem leh tui-hna humhalh that pawimawhna inzirtirna neih a ni.
Inkhawmah hian PHE Chief Engineer (Zone-I) Er. Ngentluanga’n kumin World Water Day thupui, ‘Water & Gender’ tih hmangin thu a sawi a, tui hnianghnar taka a luanna hmunah chuan intluktlanna a awm thin tih sawiin, tunlai khawvelah mipa leh hmeichhiate intluktlanna thlentu hnar pawimawh tak a nih dan hrang hrangte a sawi bawk.
Chief Engineer (Zone-II) Er. Lalropuia chuan, “Mizoramin fur laiin ruahtui hnianghnar takin (2 – 2.5m) hmu thin mah ila, thalah erawh tui kang avangin kan buai leh fo thin,” a ti a, tui renchem nachang leh tui dah khawl nachang hre thar leh theuh turin mipui a chah.
Central YMA President R. Lalngheta pawhin thu sawiin, kalkhawmte chu ruahtui khawl kawngah tan la thar turin a chah a, Department atanga tui semah innghat ringawt lo tur leh tui renchem leh khawl kawngah mahni zawnah theuh hmasawn a ngaih thu sawiin, Tlawng lui chu enkawl leh venhim ngai tak a nih thu a sawi bawk.
World Water Day hmannaah hian lui tui leh tui hnate humhalh tura thutiam chham rual niin, tui hna humhalh kawnga inelna hrang hranga ti thate hnenah lawmman sem a ni.