Aizawl: Village Council, Haulawng chuan kut hnathawka eizawngten hma an sawnna tur leh an sum thawhchhuahte lukhawng nei zawka enkawl dan inzirtirna hun atan an khuaa Hausiampa Hall-ah vantlang inkhawm an buatsaih.
Lalsangzuala Chhangte, VCP kaihhruai inkhawmah hian Dr. Samuel Lalliansanga, DAO, Lunglei chuan ‘”Kut hnathawka thingtlang mite intodelhna kawng’ tih thupui hmangin thu a sawi a. Chhim lam atanga thlai tharchhuah awm lo leh hmalakna lian tham a tam loh chungchang sawiin, theihtawpa hmalak a ngaih thu a sawi.
Kum 2047-ah India-in intodelhna tur hrang hrang buaipuiin, be (dal) te, oil-ah tan a la mek a. Sorkar laipuiin hma a lak angin state sorkar pawhin hma a la mek a, heng hmalaknaah hian thalaite an chetchhuah tam a ngaih zual thu sawiin department chuan hmalakna tur a buaipui hrang hrang sawiin hmalak dan turte a sawi bawk.
KH. Lalrinkima Chief Life Insurance Advisor-in ‘Thingtlang mite sum thawh chhuah lukhawng nei zawka enkawl’ tih thupui hmangin sum peipun dan leh enkawl dan chungchang sawina leh inzirtirna hun a hmang a. Scheme hrang hrang a sawi fiah bawk.
Lalnuntluanga Chhakchhuak, VC member-in khawtlang hnathawh leh kalphung pawimawh hrang hrang, MGNREGA inhrilhhriatna leh sawi fiahna hun a hmang bawk.
Hetiang hun buatsaih hi khawtlang mipuiten an ngaihluin hlawk an ti hle a. VC pawhin hetiang hun hi buatsaih leh an tum bawk.