Indian flag tar lawng pahnih, liquefied petroleum gas (LPG) phur chuan Iran-in Strait of Hormuz paltlang tura phalna a pek hnuah India lawng chawlhmun an thleng ta a. Inrinni khan lawng dang pahnih, BW Tyr leh BW Elm te pawhin he tuikawng hi zawh tanin India an pan niin thuneituten an sawi.
Thuneitute chuan metre 230-a sei lawng, Jag Vasant hian Zirtawpni zan dar 08:00 vel khan sorkar hnuaia Deendayal Port Authority (DPA) terminal, Kandla tia hriat, Vadinar-ah a thirchakai a thlak tih an sawi.
Hetihlai hian lawng pahnihna — Indian Oil Corp-in a hman, Pine Gas pawhin Zirtawpni zan vek khan Indian tuipui a lut a, April 2-a khawchhak tuipui kam, Odisha-a Adani Group hnuai Dhamra port-ah innghat turin a kal zel tih an sawi bawk.
Lawng pahnihte hian Tehran thuneituten lawng kal phalna pekte tana an ruat kawngpuiah Iran tuipui kam an zawh a, him takin strait hi an paltlang a ni.
Vadinar-a lawng chawlhna thupuangtu, Omprakash Dadlani-a chuan Jag Vasant-a thawk mi 14-te chu an dinhmuh leh an hriselna pawh a tha tih a sawi a. Bharat Petroleum Corp-in an hman lawng hian LPG ton 47,000 a phur a ni.
Lawng chawlhhmuna a innghah hnuah a thil phurh lawng dangah hlangin a thlenna tur hmun panpui tur a ni.
BW Tyr leh BW Elm hian Inrinni khan Strait of Hormuz an paltlang tan niin a hrechiangtu pakhat chuan a sawi a. BW Tyr hian Thawhlehni hian Mumbai a thleng dawn niin an sawi bawk.
Shipping ministry thuneitu sang, a hming tar lan duh loh sawi danin BW ELM hian New Mangalore a pan mek a, thawktu 28 (Indian vek) an chuang a, propane ton 23,860 leh butane ton 23,139 an phur niin a sawi a. Bungrua hi Hindustan Petroleum Corporation Limited tana ruahman a ni.
“BW TYR hian Mumbai a pan mek a, thawktu 27 (Indian vek) an nei a, Bharat Petroleum Corporation Limited tan propane ton 23,653 leh butane ton 22,926 a phur a ni,” tiin a sawi belh bawk.
Directorate of Shipping (Mumbai)-in status report a siam, chanchinbu thenkhatin an hmuhah chuan, “BW TYR hi March 31 zan dar 08:00-ah Mumbai thleng tura ruahman a ni a, BW ELM hian New Mangalore a pan dawn a, April 1 chhun dar 12:00-ah a thlen beisei a ni a, Indian flag tarna LPG phur lawng dang pathum, Jag Vikram Green Asha leh Green Sanvi te chu tunah hian Mina Saqr-ah an awm mek a, Strait of Hormuz hmar lam kal tlanga kalna tur Indian Navy-in thupek a chhuah an nghak,” tih tar lan a ni bawk.