Aizawl: Fisheries Minister Lalthansanga chuan Keilungliah, Champhaia District Fisheries Development Office leh Keilungliah Reservoir Management Committee tangkawp buatsaih Nghakuai Chiah Runpui 2026 (Fish Festival) chu a khar a, sangha man tha te hnenah lawmman a sem nghal bawk.
Kharna inkhawmah minister chuan Mizoramah sangha khawi nana hectare 4,500 hman theihah 1,000 chiah la hman tangkai a ni a, sangha khawitu pawh an la tam tawk lo a, Mizoram hian hmun dang atanga sangha lak ngai lo turin an intung ding thei a ni tih a sawi a. Bana Kaih hnuaia tanpuina te, PMMSY hnuaia hamthatna te pawh a awm reng a, hmang tangkaia sangha dil tha tak siama tha taka eizawnna insiam thei turte tan chuan heng hamthatna hi lak ngei a that thu a sawi bawk.
Fish Festival-a sangha man lian ber chu R. Lalhmingliana, Champhai Vengthar niin, a sangha man hi kg 1.465 a ni a. Sangha man hnem ber chu H. Lalruatfela, Tuithiang a ni a, sangha man naupang ber chu Lianthangpuia, Champhai Bethel niin, kum 11 mi a ni a. Sangha mantu zinga upa ber leh hmeichhia man tha ber chu Malsawmkimi, Zotlang, Aizawl niin, kum 44 a ni a. A sangha man hi gram 636 a ni.