Aizawl: Mizoramin NCC Fest & Paragliding Camp a thlen tur chungchangah Mizoram Chief Minister Lalduhoma leh 2 Mizo Battalion NCC Commanding Officer, Colonel Sagar K Mohanty te chu Thawhtanni khan CM pisa-ah an inkawm.
An inkawmnaah hian Col. Mohanty chuan Mizorama NCC Fest & Parasailing Camp hmasa ber tur, May ni 5–11 chhunga Lungleia buatsaih tum a nih thu a sawi a. NCC chungchang hriat zauna tur leh thalaiten NCC zawm tura fuih phurna tura ruahman a nih thu a sawi a. Khua leh tui tha ni tura thalaite chher hriam leh mahni inthunun theihna, inrintawkna leh huaisenna rilru pu tura kaihhruai chu he hma lakna hian a tum a nih thu a sawi.
Chief minister chuan Col. Mohanty hnenah Mizoram thalaite hmasawnna atana hma lakna pawimawh tak a nih thu a sawi a. NCC chu thalaite nungchang siamtu leh hruaitu nihna kawnga chher hriamtu pawimawh tak a nih thu sawiin, Lungleia NCC Fest hmanpui tura sawmna pawh chu tihhlawhtlin ngei a tum thu leh an hma lakna a phurpui thu a sawi.
NCC Fest-ah hian sorkar hotu pawimawh leh sipai hotu liante nena inkawmna hun te, NCC chhuak (alumni) te nena inkawmna hun te a awm dawn a. NCC thil leh hriat tur pawimawh pho chhuahna leh Border Security Force, Assam Rifles leh Territorial Army Bn te ralthuam pho chhuahna te buatsaih a nih dawn bakah, Mizoram tualchhuak puan leh themthiam thil mawi tak tak pho chhuah a ni dawn a. Mizo ei tur chi hrang hrangte pawh chhawp chhuah a ni ang.