MNF Legal Board chuan inthlan apianga hmeichhe candidate-ten mawi lo tak taka social media-a beih an tawk chu pawi an tih thu sawiin hei hi hmeichhe candidate-te hmuhsitnaah an ngaih thu an sawi.
Thawhlehni khan MNF Legal Board chuan Aizawl Press Club-ah thuthar thehdarhtute an kawm a, an Treasurer Zothansangi Hmar chuan tun hnaiah inthlan tawh zingah Model Code of Conduct bawhchhiat avanga Election Commission of India thlenga inrawlh ngaia an awm thin chu pawi a tih thu a sawi a. Inthlanna felfai leh thianghlim tak neih a nih theihna turin sorkar lai mek party worker-te chu hmahruaitu tur leh entawntlak ber ni turin Zoram mipuiin an phutin an beisei tih a sawi.
Zothansangi Hmar chuan Aizawl Municipal Corporation (AMC) inthlana hmeichhe ward bakah general ward-a hmeichhia an awm ta nual chu hmasawnna nasa tak karah, hmeichhe candidate-te social media kaltlanga mawi lo tak taka beihna a lo chhuak thin chu MNF chuan pawi an tih thu sawiin, “Hmeichhiate dinhmun rah behnaah kan ngai bawk,” a ti.
MNF Legal Board treasurer chuan AMC inthlan lo awm turah, a bikin tun hnaia Ward IV-a MNF candidate, R Lalnunthari (Nunui Rualhleng) chuan mawi lo tak tak, hmeichhiat mipatna rawngkai leh hmeichhiate zahawmna tibawrhbang thei zawnga beihna a tawk nasa chu an ngaih thutak thu sawiin, “Hetiang hi a thleng leh a nih chuan a tul ang zelin MNF Legal Board chuan hma kan la ang. Kan candidate hmeichhiate hi engtiklai pawhin an thlavang hauh turin kan inpeih reng a ni,” a ti.
Mizoramah hmeichhiate ram hruai turin an lo pen chhuak mek zel chu hlu an tih thu sawiin Zothansangi Hmar chuan, “Amaherawhchu, tuna kan inbeih ang hi chuan hmeichhiate tan politics hi thil tihbaiawmah kan chhuah mek niin a lang,” tiin, tuna an inbeih dan mawlmang tak tak hian hmeichhe fel, lehkhathiam, talent nei tha leh zahawm tak takte a titawmim zo ang tih a hlauhawm thu a sawi bawk.
Zothansangi Hmar chuan AMC inthlan turah hian hmeichhe candidate tam tak an awm a, heng an hmeichhiatpuite sawiselna, ram rawngbawlna kaihhnawih ni lovah a awm thin chu an do tlan a, party tinte pawh an tanrual a tul a. An hmeichhiatpuite thlavang hauhva theihtawp chhuaha an do let ve hi India khua leh tui an nihna mai bakah Mizo nihna angin a tul tiin a hmeichhiatpuite a chah bawk.