Aizawl: Social Welfare department leh Mission Foundation Movement tangdunin kum upate enkawlna lam zir – gariatric caregiver zir chhuak mi 120 hnenah Nilaini khan certificate a hlan a, a hlanna inkhawm hi district pali – Champhai, Lunglei, Mamit leh Saitualah hman a ni.
Gariatric caregiver hi district paliah a remchan dan angin hun hniha kalpui a ni a, hei hian college zirlai zir ve duh tan hun remchang a siamsak thei a, harsatna leh buaina em em tawk lovin theory leh pratical class leh exam an zo thei a ni.
Certificate hlanna hi Mamit-ah bialtu MLA Er H Lalzirliana, Lunglei-ah MLA T Lalhlimpuia, Saitualah Additional DC Lallawmawma, Champhaiah hian MUP Sub Hqrs. vice president H. Lalzova te khuallian an ni.
Khualliante hian hetiang hun tha, thalaite tana buatsaih a ni chu lawmawm an tih thu sawiin, fuihna thu tha tak takin zir chhuakte an fuih a ni.