- Dr. C. Lalrampana
Aizawl Municipal Corporation (AMC) inthlanpui chu April 21, 2026-ah nei tura ruahman a ni ta a, inthlan chungchanga thil pawimawh thenkhat tarlang hmasa phawt teh ang:
Electoral Rolls: Electoral roll hnuhnung ber tihchhuah a ni a, vote nei zawng zawng 2,39,989 an awm a, chung zingah chuan hmeichhia 1,29,656 leh mipa 1,10,333 an tel.
Wards: AMC hian ward 19 a nei a, seat 6 chu hmeichhe tan dah a ni.
Inthlan hmasa: Kum 2021 inthlanah khan Mizo National Front (MNF)-in seat 11 an la a, Zoram People’s Movement (ZPM)-in seat 6 an la a, Indian National Congress (INC)-in seat 2 an la bawk. Tichuan, tunah hian MNF Party-in Sawrkarna a chang mek a ni.
Aizawl Municipal Corporation (AMC) hian civic duties hrang hrang a thawk a, chung zingah chuan:
1.Urban Planning: Khawpui ruahmanna, ram hman dan tur dan siam, leh building sak dan.
- Mipui hriselna: Faina, bawlhhlawh enkawl dan, leh tui pek dan.
- Infrastructure: Kawngpui siam, kawngpui eng, leh vantlang tana hman tur park leh inkhelhna hmun siam.
- Environmental Conservation: Khawpui chhunga ramngaw humhalh, boruak bawlhhlawh tihtlem, leh nungcha humhalh.
- Social Welfare: Slum tihchangtlun, retheihna tihziaawmna, leh mi harsa zawkte tanpui.
- Vital Statistics: Nau piang leh thite hming ziahluh.
- Revenue Generation: Property tax, profession tax, leh tualchhung chhiah dangte.
- Cultural Promotion: Cultural heritage humhalh leh arts tihhmasawn.
AMC hian duhthlanna (discretionary functions) a nei bawk a, chungte chu:
1.Beautification: Park, huan, leh ramngaw siam that.
- Zirna: Zirna lama hmalakna tihhmasawn
Sports: Infiamna leh nunphung lama thil thlengte tanpui. - Animal Control: Ran chunga tihduhdahna laka invenna.
- Disaster Management: Kangmei ven hna leh emergency response.
Heng mawhphurhnate hi Mizoram Municipalities Act, 2007-ah tarlan a ni a, AMC inrelbawl danah hian member thlan bikte, ward committee, leh local council-te a tel a ni.
Thingtlang lama kan unaute tan chuan AMC lo ngaihven ve chiam hi a tulna a awm lem lo mai thei. Mahse AMC dawr mamawh chang an nei ve thei. Hetih hunah hian AMC sawngnawi lutuk thlan tlin a nih chuam AMC huamchhunga mite ang bawkin an tuar ve thei chang a awm ve thei tho bawk.
Aizawl khawpui chhung leh AMC huam chhung veng penhleha chengte tan erawh kan zavaia AMC inthlanah hian rilru kan sen a tul a ni. Political party tinte’n Ward tin atan candidate an han puang ta a, an candidate-te affidavit leh an biography & profile-te, pamphlet leh social media platform hhrang hrang hmangin an inphochhuak thin a. Mahse, heng atang ringawt hi chuan tunge an nih, an mize dik tak leh an thatna [quality], thiamna [efficiency], zia [personality], rinawmna [loyalty], khawsak dan [behaviour], nungchang [character], an chimsan zawng [caliber] leh an thiamna [skill] bakah politic-ah hlawhtlinna emaw tawhriat an nei tawh em tih a hriat mai theih loh. Candidate indaih lo deuh political party-te phei chuan a hman hman leh awlthawng remchang apiang an theh chhuak veleh tawp thin iin a lang. Tin, hruaitu tha leh tling tehna [criteria] atan hian sum ngah leh hausakna bakah zirsanna leh sakhaw rawngbawlna hrang hrang bakah NGO ilova nihna [designation] ngah apiang hi mithaah ngaiin kan teh tling fo thin, Mahse, hei hi tehna dik ber a ni lo. Eng kawngah pawh mifel leh, zahawm, laktlakte chu retheiin thiamna nei sang lo mah se, upahovin ‘pianpui BA nei’ an tih ang mibik tak leh fel tak an awm thin. Hetiang mite hian hruaitu nihna hi lehkhathiam tak tak leh hausa ringawt ai chuan ram leh hnam, khawtlang kaihhruainaah han awmzia an nei thui zawk daih a, an chhenfakawm zawk daih bawk thin. Tunah pawh Political Party tinte’n Candidate an han puang ta a. An nihna leh thiamna, khawsak dinhmun ringawt atang chuan mifel tak tak, lehkhathiam degree nei tha tak tak an kat nuk mai. Mahse, achunga tarlan an nihna tura beisei pha lo khi engzat nge awm ang le? A taka belhchian vek hman an ni si lo. Milar [Celebrity] leh chhungkaw hung, mi ngaihsan laklawh ram kaihhruainaa tawn hriat nei leh thiamna nei mumal mang hauh si lo theh chhuah kan ching thin.
Chuvangin, AMC huam chhunga mipuite hian tihtakzeta ngaihtuahna senga hruaitu tur kan thlan thiam a ngai dawn a ni. Chutianga hruaitu tha kan thlan chhuah theihna tura kan tehfung [criteria] tura thate chu tarlang teh ang:
Pawl, kohhran leh NGO hrang hranga nihna chelh duah lo;
Kohhran leh mihring rawngbawl lova Pathian tihna tak tak neitu;
Chhungkaw kehchhia [broken family] atanga zichhuak ni lo;
Mahni thu thua tal [opinionated action] ching lo;
Eiruk leh hlemhletnaa fihlim, hming hliauna nei lo;
Mahni ward mipuite ngaihtuah a, ward hmasawnna tak tak ngaihtuah mi;
Mi inngaitlawm leh mirethei leh hausa thliar hrang ngai lo;
Mahni party mi leh sa ringawt duhsak lova ward mipui zawng zawng thatna duh mi;
AMC dan leh hrai leh Political administration hmelhriat mi;
Kohhran, NGO leh mihausate tihlawm tum reng renga tal lo tur etc.
Tehna tur tam tak a awm a, sawi vek sen erawh a ni lo. Mitha famkim, sualna nei lo erawh tumah an awm lovang. Chutih rualin, mi verther, mi depde, mi pamham, duham, hlemhle leh mahni nghawng ringawt tilian chi kan hnawl ngam a ngai ang. Tin, AMC mipuite’n kan hriat hmaih fo leh kan thanmawh bawk lian ber mai chu mahni awmna pawl [political party] bak hawi zau duh lova ‘Kan party mi leh sa a nih phawt chuan Buara pawh nise, ka vote tho tho vang” tihna rilru kan pu nghet tlat thin hi a ni. Mahse, he ngaihdan tha lo leh atthlak tak pawh hi kum 2023 MLA inthlanah khan Zoram mipuiin kan hrethiam sawt hle tih a lang thei. Mahse, inthlanna tur bial a zim lutuk hian mahni awmna pawl theuh tan a na zualleh fo thin. Chuvangin, kan hmalawk AMC inthlan lo awm turah pawh hian MLA aiin bial a zim fe dawn a, mahni awmna pawl ngainatna leh tanna a lianleh hle thei a, hei vang hian AMC mipuite’n MLA inthlana kan rilru ang khan AMC pumpui leh ram mipuite tana a taka thawk tur mi tha leh fel thlang chhuak thei turin kan inbuatsaih theuh a pawimawh takzet a ni.
A tawp berah chuan AMC hian Civic duties 9 leh function 4 a neihte khi uluk takin han en la tuna sawrkar mek hian enge tih loh a neih emaw enge tih that a neih tih chu tehna [criteria] pawimawh tak a ni. AMC hi state sawrkar hian thuneihna a pe tlem hle niin a lang. A bik takin Kum 2025-2026 chhunga Aizawl Municipal Corporation (AMC) sum ruahman chu ?112.17 vbc. a ni a, 79.83% chu hmasawnna hna thawhna atan ruahman a ni. Mizoram sorkarin kum 2025-2026 chhunga a sum ruahman zawng zawng chu ?15,198.76 vbc a ni a, ?3518.37 vbc chu Economic Services Sector-ah dah a ni. AMC tana Urban Local Body Grant hi ?40 vbc a ni. AMC sum ruahman dan emaw, hmasawnna tur ruahmanna emaw hi uluk taka chhut a ngai a ni.
Kum 2025-2026 chhunga Aizawl Municipal Corporation (AMC) sum ruahman chu ?112.17 vbc a ni a, 79.83% chu hmasawnna hna thawhna atan ruahman a ni. Budget estimate siam?hat hi ?114.04 vbc a ni a, budget hmasa aiin ?186.97 lakh zetin a pung a ni. Budget ruahman dan tlangpui pawh hetiang hi a ni:
- Hmasawnna hna: ?91.52 vbc (budget atanga 80.25%);
- Hlawh leh Hlawh: ?15.73 crore (budget atanga 13.79%)
- Tualchhung Council Grant: ?122 lakh
AMC sum lakluhna lian ber berte chu:
- Finance Commission 15-na Grant: ?60.30 vbc a ni.
- State Sawrkar sum: ?25.57 vbc.
- Mahni Source Revenue: ?7.5 vbc a ni.
AMC hmasawnna: Kum 2025-2026 chhunga Aizawl Municipal Corporation (AMC) sum ruahman chu ?112.17 vbc a ni a, 79.83% chu hmasawnna hna thawhna atan ruahman a ni. Mahse, tuna AMC budget-ah hian deficit financing chungchangah hian thil awm dan chiang tak hmuh a harsa hle.
Heng atang hian sawrkar mek hian vbc engzat nge a hman tawh a, state-in engzat nge a pek a, a dang pek loh a la nei em? Heng atang hian eng chen chiah nge hmasawnna kan neh tawh tihte chhut telin tuna kan hmaa inthlan lo awm turah pawh hian uluk taka kan hlutna kan hman ttheuh a ngai a ni. Sawi hmaih hauh loh tur chu Aizawl khawpui kawgpui dung Kulikawn-Zemabawk inkara mimal lirthei sumdawngte ta nileng lenga ding tlar thut reng thin hi umbo thei tur AMC kan thlan chhuah theih a hun tawh hle a, hei hi AMC inthlan ka nghahhlelh chhan berte zinga mi pakhat a ni. Smart City-ah hlan kai kan ni tawh a, a la smart lohna lian tak, shopping mall-a lirthei ding nileng thak thak thin vaikian hna a taka thawk ngam leh development project hlawtling taka kalpui thei AMC sawrkar neih hi a nghahhlelhawm takzet a ni e.