Damdawi hman phal loh hman vanga infiammi hrem kawngah India a langsar thar hle a, Athletics Integrity Unit (AIU) list-ah India chuan Kenya lehpelin pakhatna a hauh a. India rama track and field athlete hrem mek 148 an awm a, hei hi Africa khawmualpui ram Kenya aiin pahnihin a tam a ni.
He list thar ber hi kumin April ni 1 thlenga mi a ni a, Russia chuan infiammi hrem 66 neiin pathumna an hauh thung.
Hrem tawk mek zinga India infiammi hming langsar zualte chu:
Dutee Chand: Hmeichhe 100m-a national record chelhtu, December 2022 atanga kum li chhung hrem mek.
Parvej Khan: Middle distance runner, July 2030 thlenga kum ruk chhung hrem tur.
Sekar Dhanalakshmi: Tamil Nadu sprinter, kum 2025 atanga kum riat chhung hrem tur.
List-ah hian national level-a thubuai leh thutlukna siam vanga hrem mek te pawh an tel a ni.
Hman phal loh damdawi hmang kher lo, dan bawhchhe tho si, test tur thil tihchingpen (tampering), fiahna (test) hmachhawn peih lo, damdawi tawlhruk leh awmna hmun tichiang lo (missing whereabouts) te pawh an tel a, hengte hi damdawi hmangte nena hremna inang reng pek an ni.
Athletics Integrity Unit (AIU) hi World Athletics in a din, anti-doping chungchanga zalen taka thlirtu leh viltu an ni a. International level infiammite leh anmahni puitute chungah thuneihna an nei a ni.
Doping hluar zel tur ven nan hian Athletics Federation of India (AFI) chuan khauh takin hma a la a, ram chhunga hetiang thil tha lo thlenna hmunpui nia hriatte pawh an zawng chhuak mek a ni.
Infiammiten damdawi hman phal loh an hman chhanah hian trainer te pawhin mawhphurhna lian tak an nei thin tih sawiin, AFI chuan coach zawng zawngte chu inziak lut (register) turin an hriattir bawk a. Coach inziak lut lote chu blacklist an ni ang a, an naute (trainees) chu national award dawng thei lo tura ngaih an ni ang.
Kum 2024 Paris Olympics zawh hnuah khan AFI chuan national camp te chu hmun khata awmkhawmtir loin a then darh a. Tun dinhmunah AFI hian relay team-te tan chauh national camp a buatsaih tawh a ni.
Infiammi tha dang zawngte chuan inbuatsaih nan private pawl leh company, Reliance, JSW, Tata te emaw, sawrkar department, Army leh Navy te an thlang tawh zawk a ni.