Aizawl: MNF Thalai President Robert Romawia Royte chuan MNF kaihhruai Aizawl Municipal Corporation (AMC)-in Bawngkawn Brogade Field a siamnaah thil dik lo a awm lo tih a sawi.
Inrinnia Aizawl Press Club-a thu thar lakhawmtute a kawmnaah zawhna chhangin MNF Adviser ni bawk Robert Romawia Royte chuan, Bawngkawn Brigade Field chu phullem phahna tura sum sanction a ni lo hrim hrim a, Lengpuia Football field-a phullem phah te nena khaikhin chi a nih loh thu sawiin, “AMC-in Bawngkawn Brigade Field a siamnaah thil dik lo a awm lo,” a ti.
AMC-in Bawngkawn Brigade Field a siam chungchangah thil dik lo a awm nia sawituin engvanga action la lo nge an nih tih chu a zawhna a nih thu sawiin Sports Minister hlui, Hachhek bialtu MLA ni bawk Robert Romawia Royte chuan, “Thil dik lo a awm nia sawituin engatinge action an lak loh? Inthlang mai tur an nih avangin AMC chu MNF sorkar a nih avangin miin an rinhlelh theihna atan an ti mai mai a. Hemi chungchangah hian open debate pawh ka cho em em em a ni,” tiin, hemi chungchang hi CBI te, ACB te’n chhui se a duh thu a sawi a. Chhui tir duh si lova mipui rinhlelh tawk leka sawi chu a puitlin loh thlak a tih bakah, sorkar lai tihchi pawh a nih loh thu a sawi bawk.