Congress President Lal Thanzara chuan ZPM leh MNF-in BJP thawhpui chunga ram an kaihhruai zel chuan chung lam malsawmna dawn a beisei awm loh thu a sawi.
Inrinnia AMC Ward No. XVIII leh XIX-a Congress party-in infuihtharna an buatsaih a hmanpuinaah MPCC president chuan BJP kaihhruai sorkar laipuiin lei lam leh tisa hmasawnnain vur mah se ringtu an nihna kawngah an dawih phah tur a ni lo tih a sawi a. BJP chu Kristiante nuai chimih duh leh tum mektu an ni chungin ZPM leh MNF-in an thlawp tlat chu thil pawi tak a ni a, hetiang miten Mizoram an enkawl chhung chuan chung lam malsawmna an dawn a beisei awm lo va, ZPM leh MNF-ten BJP tihlungawi loh hlaua Krisitiante thlavang an hauh ngam loh fo chuan thlarau lam tampui an tawk ang tih a hlauhawm niin a sawi.
MPCC president chuan BJP kaihhruaina hnuaia Kristianten nasa taka tihduhdahna an tawrh laiin Mizoram chief minister chu ngawi rengah a puh a. Hei hi Kristiante nuai chimih tumtu BJP mitmei a ven vang nia sawiin Aizawl mipui, Mizo mipuite leh kohhran mite harh a hun tak zet tih a sawi a. Kristian missionary-ten chanchin tha hrilna kawngah harsatna tam tak an tawh mek chu pawi a tih thu a sawi a. Hetiang an ni chung pawha an la harh chhuak thei lo a nih chuan Mizo Kristiante tan a pawi khawp ang, a ti bawk.