UD&PA Minister K Sapdanga chuan Aizawl Municipal Corporation (AMC) inthlan lo awm turah ZPM chuan a hlanga sorkar siam an inbeisei tih a sawi.
Inrinnia Ramhlun North LAD Office bula AMC Ward No III Campaign Kick Off buatsaih a hmanpuinaah K Sapdanga chuan, AMC inthlan tura Coorruption Free AMC siam an tum avangin ZPM party candidate-te chu eirukna laka fihlim thei tur vek an nih thu sawiin, “State sorkar leh Val Upa Council-ten uluk takin an vil zui ang a, AMC-ah Pathian ram tun din tumin theihtawp an chhuah dawn,” a ti.
Lunglei Municipal Council inthlana an solid tum aiin tuna AMC inthlan turah hian ZPM thli a na zawk nia sawiin K. Sapdanga chuan, “A hlanga sorkar siam kan inbeisei a, a result erawh chu Pathian leh mipui kutah a awm a ni,” a ti.
Home minister ni bawk, K Sapdanga chuan Urban Local Body Fund Finance Commission atanga dawn te, state sorkar atanga fund te leh property tax atanga mipui thawhkhawmte hi dik taka hman ni se, khawpui tihhmasawn nan a tangkai thama a hriat thu a sawi.
Aizawl khawpui chhunga bawlhhlawh lak khawm dan tha zawka kalpui an tum dawn tih sawiin K Sapdanga chuan, “Mipuiin bawlhhlawh motor lo chan ngai tawh lovin, in tina mi khawn (door to door collection) hi veng thenkhatah enchhin a ni ang a, mipuite zangkhaina siam ni bawk, fai zawkna a ni bawk dawn a. Bawlhhlawh paihna atana sum che vel hian chu chu a daihin ka hria,” a ti.
Bawlhhlawh sawngbawl dan pawh mumal zawkin, chhuahlam Tuirial kamah tawih thei chauh, tlak lam Luangmual ramah tawih thei lo plastic etc., chhim lam Hualngohmunah in sakna bungraw chhiate, awmze neia process-in hralh suma chantir vek an tum tih sawiin, state sorkar lungrualpui thei AMC-ah a sorkar a ngai tiin, Aizawl mipuite ZPM candidate vote theuh turin a sawm.