Inter Miami chuan an stadium thar, mi 26,700 lenna Nu Stadium chu nimin khan an luah lut ta a, kum 38 mi Lionel Messi chuan an khelmual tharah hian goal a khung nghal – a team erawh a chakpui zo lo a, MLS-ah Austin nen 2-2 in an inhnehtawk.
Austin hian Guilherme Biro leh Jayden Nelson hmangin vawi hnih ngawt hma an hruai a, mahse, Miami club hian Messi leh Luis Suarez hmangin si phurh an sut – Suarez tan tun season MLS-a a inlan hmasak ber niin, goal a khung nghal.
Kum 38 mi, Messi tan erawh MLS match nga a khelha goal nga a khungna chiah a ni a, season hmasaa a champion pui Miami hi table-ah palina a nihpui mek.
Miami hian kum 2020 khan MLS khel ve chauhin, club tharlam tak an ni a, hetih chhung hian Chase Stadium chu hawhin an khelmual atan an hmang thin. Tunah erawh mahni mual ngei an sual chhuak ta a, he stadium-ah hian Messi hmingin ‘stand’ a awm bawk.