Aizawl: MNF Sr. Vice President Dr R Lalthangliana chuan chhan hrang hrang avangin ZPM chu Aizawl khawpui enkawltu atan an tlak lo tih a sawi.
Thawhtannia MNF Aizawl South I Block Executive Meeting leh AMC ward XVI & XVII candidate-te inhmelhriattirna hun chu Aizawl Central Hall, Venghluiah neih a hmanpuinaah Dr.R. Lalthangliana chuan ZPM an sorkar tirh atanga kumin February chhunga ZPM sorkarin sum an puk zat chu Rs vbc 6,445.45 a ni tawh a, SASCI loan-ah Rs vbc 2,482.57 an puk tih sawiin, “Kan puk ve lo ang tituten an puk nasa ber,” a ti.
Kum 2026-27 budget pumpui Rs vbc 17,076.92 anih laiin, leiba chu Rs vbc 19,085.15 a ni a, budget aia leiba a tam zawkna chu Rs vbc 2,008.23 a tling tawh tih sawiin, hetiang thil hi Assembly House-ah kum 36 vel a lo thut ve tawh chhungin a thlen a la hriat ngai loh thu a sawi.
MNF Adviser Dr R Lalthangliana chuan tun hnaiah MLA Robert Romawia Royte-in ZPM sorkar tirh kum 2023-24 khan SASCI part-1 sum sanction fel sa thlap Rs nuai 11,152 leh sum allocate sa Rs nuai 32,800 a ti lapse a, a vaiin Rs nuai 43,952 lai a lapse tih a hai chhuahah, sum an tih lapse zingah AMC ward XVI huam chhunga Bethlehem vengthlang hall sakna tur Rs vbc 9.50, Bethlehem Vengthlang High School sak thatna tur Rs vbc 2 leh College veng Hall extension-na tur Rs vbc 3.5 a tel ve nia a hriat thu sawiin, “Hengte avang chauh pawh hian Chief Minister Lalduhoma chu finance management a thiam lohzia a lang chiang hle,” a ti a. Hengte leh chhan hrang avang hian Aizawl khawpui enkawltu atan ZPM hi an tlak loh thu leh, hnawl ngam a tul tih a sawi bawk.