Aizawl: BJP Mizoram Vice President Vanupa Zathang chuan rem leh rem lova politics hi sakhuana nena chawhpawlh luih tum thinte hian ram an tichhek mek tih a sawi.
BJP Mizoramin an party pisaa nimina Karthar inhlanna leh BJP Foundation Day lawmna an hmanah thu sawiin Vanupa Zathang chuan, BJP hruaituah ram hmangaih avanga mahni in leh lo te, nupui fanau te leh mahni chhungte aia ram hmangaih thlan avanga inpe hruaitu an nih hlawm avangin, BJP kaihhruai sorkar a pian hnuah development nasa takin India ramah a thleng a, tunah phei chuan PM Modi-a kaihhruai sorkar term 3-na kal mekin kawng engkimah khawvel mit fukna an lo ni ve thei ta tih a sawi.
Politics hi rem leh rem lo va, sakhuana nena chawhpawlh luih tum thin te hian ram hi an tichhe mek tih sawiin BJP Mizoram Vice President chuan, “BJP beihna tur an hriat tawh loh avangin dawt hmangin mipui rilru an suk sak thin a ni. Chung mite chuan ram an hmangaih ngai lo va, an mahni leh an chhungte tan leh an tangkai pui theih tur mi te tana an sorkar thin avangin kan ram pawh hian hma a sawn hleithei lo a ni,” a ti.
Tun hun hi thalaite hun a nih angin, BJP Foundation Day vawi 47-na chauh leh BJP National President pawh kum 45 mi chauh an nei hian thalai party leh thalai hmakhaw ngaitu party an nihzia a lang chiang hle a ni, a ti bawk.
Inkhawmah hian BJP State President Dr. K. Beichhua chuan ‘47th BJP Foundation Day’ lawm nan BJP Flag a pawt pharh a ni.