Aizawl: ZPM Adviser Lalnghinglova Hmar chuan AMC-ah ZPM an sorkar chuan ran vulh leh in sak buaipui dan siam that a ni dawn tih a sawi.
ZPM in an party pisa-a Thawhtannia chhung inkhawm an neihah thusawiin Lalnghinglova Hmar chuan, “AMC inthlan awm turah ZPM kan sorkar chuan Aizawl khawpui huamchhunga ran vulhna dan kan ennawn dawn a, AMC huamchhunga in sak buaipui chhung rei lutuk tihziaawm nan Building Regulation 2007 ennawnin a tul angin kan siam tha ang,” a ti.
Tuna dan hman mekah Aizawl khawpui huam chhunga ran vulh phal loh hi ennawn a tul tih sawiin Sports Minister ni bawk Lalnghinglova Hmar chuan, “Veng hrang hrang local council-te nen inrawn tlangin vulh theihna hmun tur leh veng te siamfel a ngai a, hei hi kan ngai pawimawh takzet a ni,” a ti.
“In sak buaipui chhung rei lutuk tihziaawm nan Building Regulation 2007 leh Site Development Modification Regulations, 2017 te ennawnin a tul anga siam that a ni ang a, in sak buai chhung rei lutuk hi mipuite harsatna tawh lian ber pakhat a nih avangin ZPM sorkar AMC kan siam a nih chuan in sak a awlsam tawh dawn a ni,” Lalnghinglova Hmar chuan a ti bawk.
Tourism Minister Lalnghinglova Hmar chuan, Tourism department leh UD&PA hmalakna hnuaiah zan thum riah daih Aizawl khawpuia Tourism programme an duang a, hemi hmang hian Aizawl economy chawikan an tum a, an tih theih ngei pawh an rin thu a sawi a. Sakawrhmuittuai, Muthi, Durtlang North, Durtlang, Hangi Lunglen Tlang, Laipuitlang, Lammual, Khawhpawp, Ailawng & Reiek, Sailam, Sialsuk, Hmuifang-te Tourist hipna turin an chei thar dawn a, pawisa pawh an dawng tawh fel tawh a. Khualzinte an hun tam zawk Aizawlah an cham theih chuan sum tam tak an thlauh dawn a, chu chu Aizawl mipui, a bikin sumdawngten an chhawr dawn a, sum lengvak a tam ang a, an zavaiin an chhawr dawn niin a sawi.