Aizawl: Mizoram Larsap General (Dr) Vijay Kumar Singh chuan Pathianni khan Punjab National Bank (PNB) din champha 132-na puala PNB leh Indian Armed Forces tangdun buatsaih ‘PNB Soldierathon 2026’-a tlante chu Jawaharlal Nehru Stadium, New Delhi atangin a vai liam.
Larsap General Singh chuan PNB leh Indian Armed Forces ten taksa hrisel nana insawizawi pawimawhzia zirtir nana Soldierathon an buatsaih chu lawmawm a tih thu a sawi a. FIT India Campaign hmalakna hnuaiah he Soldierathon hi huaihawt a nih thu sawiin, hemi hmang hian mipuite hnenah taksa chak leh hrisel neih pawimawhzia zirtir thin a ni a, he thuchah hi an thehdarh nasat chuan khawtlangin a hlawkna a tel dawn tih a sawi.
A tum hnihna tur PNB Soldierathon 2026 atan hian ‘Run For Soldiers’ tih chu thupui thlan a ni a. Operation Sindoor-a tel sipai huaisente chawimawi nan leh ‘Fit India Campaign’ kaltlanga taksa hriselna ngaih pawimawh a tulzia tar lan nana huaihawt a ni a. Soldierathon hian mipui leh sipai inkarah inlaichinna tha siam a tum bawk a ni.
He Marathon hi category pathum – 21.1 km Half Marathon, 10 km Run leh 5 km Run-ahte then a ni a, avaiin lawmman cheng nuai 19.5 hu sem chhuah a ni. He marathon-ah hian mi 27,000 chuang an tlan a ni.