- Reuben Lalnunthara Hnamte
He khawvel kan damchhung hian hringnun hman thiam hi ava tul thin tehlul em ve la. Thenkhat lah chu mahni nuam tih ang zawng zawngin chak deuh deuh an kal lawp lawp a, a then lah kalna tur hre lo niawm takin an hawi ruai bawk a. Thenkhat nun beidawngin, engmah ni a inhre lovin an tawm ang chawt a. Thenkhat mahni intodelh ngei tumin hmalam thlir ranin retheih pawh huamin nitin thlansa phulkaiin an thawk a. A then lah nileng lengin computer leh mobile hmaah awmin anmahni tawkin ni tla vanvuaiin, zan tairek thlengin chhun leh zan pawh ngaituah lek lovin, internet leh social mdia khawvelah an cheng a. Chhungte thawhchhuah sa lo in ti milianin car manto tak tak leh, bike manto tak tak khalhin an la chapo em em zui. Nula thenkhat lah incheina tlereuh tinreng duhin hmaihnawih chikim nena lan mawi tuma, thawkchhuak peih silovin khum lama eizawngin an hmanhlel bawk. Thenkhat lah milian nih nghal duhin, zawi zawia sumdawna thawhchhuah peih lova, hausak thut tumin a hlawk thei ang bera thawhchhuah tumin midang tawrhna leh thihna tur pawh pawisa map lovin an hmanhlel bawk.
Hringnun kan hmandan hi ava in ang lovin, ava inchen lo tehlul em! Chutih laiin hringnunah hian thil pali kan hriat ngei ngei tur leh kan tlawh makmawh pathum a awm. Chungte chu- Hospital, Tanin, Home leh Thlanmaul te hi. Hospitala iva kal chuan I vanneihzia I inhria ang a, mi tam tak na tuarin an rum a, damna duhin pawisa tak an seng a, thenkhat mahni sum sen pawh rul hleitheilo an awm bawk. Hriselna hlutzia leh a man tam zia I hmu anga, sum leh pai nei ten tun lo mahla I hausa hle a ni tih I hria ang. Oxygen hman man to ziate, vawikhat damdawiin awm man to zia leh damdawi man tam ziate I hria ang a. Pathianin Oxygen a thlawna alo pek che hlutzia leh damdawiin awm ngai lova I awm hlutzia leh man tamzia I hria ang a, siamtu Pathian chawimawi pawimawh zia leh a thuawih pawimawh zia i hmuchhuak dawn a ni. Accident rapthlak tak tak a inhliam leh thi te I hmu anga, fimkhur lo taka lirthei khalh pawiziate, midang tana chhiatna thlentu nih hlauhawm ziate I hrechhuak uaih uaih ang.
Tanin (jail) a I va kal leh chuan thubuai nei a tang mi zalen lo tak te Iva hmu ang a; zalenna hlutzia iva hrechuak ang a, sorkar phal loh leh thubuai neih pawizia iva hre dawn a ni. I inchhungah zalen takin I awm a,, I duh Ieh i leng a, I duh leh I inkhawm bawk a,duh duh danin I awm a, a nawmzia I hria ang. Taninah chuan thubuai rip tak tak nei naupang tak tak thubuai neih avanga kum engemaw zat jail tang tur, a then damchhung tang turte iva hmu ang a, thilsual leh pawi khawih lova I nun hlutzia I hrechhuak uarh uarh dawn a ni. Sorkar phalloh leh khawtlang duh loh zawng tih pawizia iva hmuchhuak ngei ang. Vawikhat pian man a damchhung tanina han awm mai turte khawngaihthlak zia iva hmuchhuak dawn a ni. I hringnuna mite pawikhawih lo tur leh, sorkar phalloh thil ti lo tura ilo in sum hram hram thin lawmawm zia te I va hmu ang. Pathian duh dan anga nun pawimawhzia te, nu leh pa thuawih pawimawh zia te, dan bawhchhiat pawi thui zia te iva hmuchhuak ngei ang le.
Hmun hrang hranga Home te iva tlawh leh chuan Damdawi ngawlvei, zu ngawlvei, nghei duh si nghei hleithei tawh lo; chhungte tibuai em em tute leh thalai chak vanglai nisi zawi hnup mai te I va hmu ang a. Thalai hmalam hun eng tak tak, chhungte pawhin an nghahfak ni si, engmah ti thei lova ruihhlo bawih a tang; ruihhlo tihna tur a nih chuan engmah tihhreh nei tawh lo; ruihna tur bak ngaihtuah neilo, mi a ang maite iva hmu ang a. Chhungte leh khawtlang pawhin hnawksak ti a inchhunga awm a tan pawh an duh lohte iva hmu ang Heng ruihhlo tilo tura ilo inveng hram hram thin lawmawm zia iva hrechhuak lehzual ang. Zan rei lamah Aizawl hmun tlabirh deuhte I han kalkual vel a, thalai tam tak, tlangval chak tha tak tur lo zawi nguai mai, lo bu l;awk lawkte iva hmu ang a, ruihhlo tih theihna tur a ruk ruk tur zawng ringawt mai te, mi bum tur zawng ringawt mai te iva hmuh chuan ruihhlo ilo tilo lawmawm zia leh itan leh chhungkaw tana a that zi ate I va hmu ngei dawn a ni. Veng kil leh tlabirh deuhte iva kal leh chuan nula pawisa duh vang leh ruihhlo tihna tur pawisa thawhchhuah duh avanga hnathawk peih si lo, mahni taksa zuar tam tak iva hmu leh dawn a ni.
A tawp berah chuan thlanmual lamah iva kal leh chuan – Nausen pianghlim atanga kum upa tak tak thlan iva hmu ang a; thalai nih laia thi an tam ber tih iva hmu ang. Thalai nun awmze hre miah lova mahni nuam tih zawng ang ang a nung, lirthei chak tak taka khalah fimkhurna miah lo accident a thi ta te thlan tam tak iva hmu anga, zu leh drugs avanga thit e, hringnun awmze nei maih lova damchhung tawite hun hmangte iva hmuh chuan Hringnun hi alo va mak ngai em tiin I rum vawng vawng dawn a ni.Nun hi engmah lo a lo ni, vawiinah leiah kan kal a, naktukah chuan kan chungah a awm thei a ni tih I va hmu chhuak ang a. Lal Hezekia an “ Ka damchhungin zawitein ka kal dem dem tawh ang” a tih awmzia te I hmu chhuak uarh uarh dawn a ni. Hringnun hmandan thiam pawimawh zia te, chapona hi engmah al oni lo tih te, inngaitlawm taka nun pawimawh zia leh, Pathian tih leh amaha innghah tlat pawimawh zi ate iva hmuchhuak ang . Kan damchhung tawitea hringnun hman dan thiam zir a pawimawh zia leh mi tumah hi kumhlun kan awm lo tiin hringnun awmze nei taka hman tumin I inbuatsaih sauh sauh tawh ang.