- Dr. C. Lalrampana
India ramah ruihhlo ngawlvei buaina hi a hluar hle a, mi vbc 10 vel ruihhlo tihbuai an awm niin Narcotics Control Bureau (NCB) chuan a tarlang. State hrang hranga thil awmdan thlirna chu hetiang hi a ni:
Punjab: Ruihhlo hmangtu nuai 66 an awm tih report a ni a, synthetic drug hman zat pawh nasa takin a pung.
Kerala: Kum 2021 leh 2024 inkar khan ruihhlo case registered 330% zetin a pung a, hei hi synthetic drug hman vang a ni.
Himachal Pradesh: Kum 2025 thla thum chhung khan NDPS case 597 record a ni a, kum 2024 aiin 29% zetin a pung.
Uttar Pradesh leh Maharashtra: NDPS Act (2019-2021) hnuaiah FIR tam tak report a ni.
Ram pum huapin thil awmdan hi a hlauh thawnawm hle:
India mi nuai 5.7 chuan substance hmansual an tuar.
Opioid hmang : mi 2.6 vbc-in opioid an hmang.
Zu in mi 16 vbc zu in an awm.
Mi nuai 8.5 ruihhlova inchiu an awm.
Sorkar chuan he buaina chinfel nan hian Nasha Mukt Bharat Abhiyaan hmalakna a kalpui a ni.
N.E. state bikte chhui chiang ve ila. India hmarchhak hian ruihhlo ngawl vei kawngah harsatna nasa tak a tawk mek a, a chhan lian ber chu ruihhlo siamchhuah leh hralhna hmun hmingthang tak Golden Triangle a hnaih vang a ni. N.E State hrang hranga thil awmdan thlirletna chu hetiang hi a ni:
Mizoram: N E state biala ruihhlo hman tamna ber (89%) niin report a ni a, drugs inchiu thin an tam hle.
Nagaland: Heroin no 4 hmangtu nuai 1.2 vel nia chhut a ni a, he thil hi ‘shaan flower’ tia sawi fo a ni.
Manipur: Ruihhlo inchiu hmang an tam hle. HIV+ hri leng a tam tlangpui bawk.
Assam, Meghalaya, leh Tripura: Ramri porous vangin ruihhlo tawlhrukna laka hlauhawm tak an ni bawk.
He biala ruihhlo buaina hi thil hrang hrang vangin a zual sauh sauh a ni:
Porous borders: Myanmar atanga heroin leh amphetamines awlsam taka hmuh theih a ni.
Recreational tourism: Substance hmanna darh zelna tura thawhhlawk tak a ni. Socioeconomic factors: Retheihna, hna nei lo, leh chanvo awm lohna a ni.
Heng biala ruihhlo hman tlanglawn tak takte chu zuk leh hmuam, zu, cannabis, leh opioids-te an ni a, heroin hi a hluar hle a ni.
Mizoram hian ruihhlo ngawlvei a ngahin a enkawlna kawngah harsatna nasa tak a tawk mek a. Kum 2026 March thla thleng khan kumin chhung hian ruihhlo vanga thi 19 an awm tawh a, kum 1984 atanga hetianga thi zawng zawng hi 2,016 an tling tawh a ni. Kum 2025 khan ruihhlo hmansual vangin mi 118 zetin nunna an chan a, kum sawmhnih kal ta chhunga ruihhlo vanga thi tam ber kum a ni. Statistics pawimawh tak tak hmuh theihte tarlang ila:
Ruihhlo vanga thi zawng zawng (1984-2026): 2,016
Kum 2025 chhunga thi zat: 118 (kum 20 chhunga thi tam ber)
Drug inchiuna hmang: 14,378 (kum 28-32 inkar a sang ber)
HIV Infection: 68% chu ruihhlo hmangtute heterosexual partner nena inzawm an ni.
Ruihhlo hmansual bakah mahni thil ngei ngei pawh hmansual ching an tam hle niin a lang bawk. Mualphona hrang hrang tawk an awm kurzut ta reng mai! Thlaite’n Ruihhlo an tih thin tlanglawn tak tak thenkhat chu hetiang hian tarlang teh ang:
- Heroin: -Methamphetamine: -Ganja (Cannabis): – Opium:
-Crystal Meth:
Spasmo Proxyvon leh Parvon Spas
Khuh damdawi [cough syrup] leh natna tidamtu: Over-the-counter damdawi hman dik loh fo a ni.
Heng ruihhlo chihrang hrangte hian Mizoramah thihna leh ngawlveina tam tak a thlen mek a ni.
Mizorama ruihhlo do pawl hrang hrangte leh Police leh E&ND; YMA-te hian kum 1984 atang tawh khan ruihhlo do kawngah nasa takin hma an la tawh a, an la mek bawk a, an la la zel dawn bawk tih a rin lawk theih. Taima tak leh rim taka an thawh thin avangin ruihhlo ngawiveite pawh an tawm im viau thin a, mahse, thunun hleih theih a ni lo. Tin, ruihhlo chihrang hrang an man thinte hi dah khawlin kumtin an remchan ang hunah an hãlralin an tichhe thin. Tihchhiat emaw, hâlral lohvin paih mai mai ta se, emaw khawiah emaw dah duh dah mai mai ta se, ruihhlo ngawi vei mekte bawkin an hmang tangkai zuileh mai ang tih a hlauhawm avangin a theih dan ang kawng kawnga tihriral [dispose] a ngai thin a ni. Hetianga ruihhlo man khawmsa an tihral langsar zual deuhte chu tlem i han tarlang lawk teh ang:
June 2024: Mizoram Police chuan ` 140 vbc man heroin tiamin, methamphetamine, ganja, crystal meth, opium, alprazolam, leh khuh damdaawi an halral a ni.
June 2025: Young Mizo Association (YMA) hnuaia Central Anti-Drugs Squad (CADS)-te’n ruihhlo leh psychotropic substance `4.29 crore man an tihchhiatsak a ni.
2025-26: Excise & Narcotics Department man khawmsa cheng `1,047 vbc aia tam an halral a ni,
Ruihhlo dutute’n ruihhlo chihrang hrang an man khawmsa an hâl ral thin hi tha hlein lang mah se, mihring hriselna nasa takin a nghawng chhe thei a, chuvangin, engtenge a pawina leh thatlohnate chu i han bihchiang dawn teh ang.
Opioid hâl khu hian chemical tha lo tak tak a chhuah thei a, hriselna atana hlauhawmna nasa tak a thlen thei a, chung zingah chuan:
Thawkna lama harsatna;
Overdose hlauhawmna a thlen thei. Chemical tha lo tak tak a thlen thei, Addiction a thlen thei. Hlauhawm bik thenkhat chu:
Heroin: Thluak lama harsatna, overdose, leh thihna a thlen thei;
Fentanyl: A chak hle a, overdose risk a tipung thei; Methadone: Thluak lama harsatna a thlen thei; overdose a thlen thei. Methamphetamine capsule hâl hian meikhu rimchhia a chhuah thei a, hei hian:
Thluak lam harsatna, khuh, thawk hah; Mit natna; Vun a kang thei;
Lung phu rang leh thisen sang a thlen thei; Overdose emaw poisoning emaw a awm thei. Exposure hi a hlauhawm thei a ni. Mi pakhatin a kai tawh a nih chuan damdawi lam puihna zawn nghal vat a ngai thin.
Dicyclomine, paracetamol, leh a chang chuan opioid [tramadol] ang chi emaw thil dang emaw an hâl khu a hllauhawm hle, Chutiang capsule hâl chuan chemical tha lo tak tak a chhuah thei a, hei hian: Thluak lam natna, Khuh emaw, thawk hah emaw, Mit natna, Vun a tikang, Inhaled substance atanga toxicity a awm thei.
Ruihhlo hâlin nghawng tha lo a neihte hi a zavaia tarlan sen a ni lo. Hengho hal khu hip hi mihring nunna atan a thalovin a hlauhawm hle a ni.
Heroin no 4 tiho zingah category hrang hrang an awm. Mihausa & neinung deuh te, rethei deuh te, rethei lehzualte chenin an dose azir zelin a inang lo. Heroin ngai tantirte hian a tirah chuan a khu chiai chiai an hip a, an rui tawk ve hle thin. Hengho hi a dose sang tawhte tirhkah pawisa nei si lote an ni tlangpui. A ngawl an vei tak tak hnuah an duh tam tial tial a, an hautak tial thin. Heroin hman dan hi chithum a awm thei chungte chu: Snorting: Hnar atanga powder rimtui anga hip; Inchiu [Injecting]: Thisen zam chhungah hriau [needle] hmanga thun [inject] inchiu;
Zuk [Smoking]: Mei zuk anga a khu hipluh leh thawk chhuah etc.
A bik takin Heroin No.4 ngawl vei, zun ngaih natzia sawifiah sen rual a ni lo. A khu hip hlek ringawt pawh addict theih a ni a. Tin, ruihlo dangte pawh khi tam uchuaka hman chuan mihring hriselna atana tha lo tak tak vek an ni. Hetiang khawpa nghawng nei nasa a nih lai karah ruihhlo dotu E&N Department, Police leh YMA-te’n cheng vaibelchhe tam tak tak man dahkhawla an hâl ral thin hian rinhlelh a kai pha em ngaihtuah chian ngai tak niin a lang. A chhan chu hengho hâlna bul hnaiah hian a alh rem hma chu an vil a, an hual khup thin niin a lang a. Hetiang khawpa nghawng tha lo nei, kang khu ur phaka an awm reng thei hi thil ni thei a ni em ni? Heroin ngat phei chu a khu zam chiai chiai ringawt pawh addict nghal theih a ni a, hetia ruihhlo halraltute’n Heroin hawng tam tak tak an hal thin nia ngaih hi a tak tak nge a lem maida/Atta dip mai zawk a ni thei em? Kum khat emaw thla 6 emaw dahkhawl chhung hian ruihhlo dik tak an man hi ruihhlo lem [duplicate]-in a thlak thei em ni ang? A hãl raltute hian thihpui pheng phung tur emaw natna benvawn leh depression, anxiety etc. vei sup sup awm tak a nih laiin tuman a side effect pawh an tuar ngai si lo. A lem hlir hãlral thin ni ta se, a tak tak zawk hi tuten emaw sumdawn nan an hmang char thin tihna em ni ang le??? Chuvangin, ruihhlo man khawm hâlral thinte hi a tak nge a lem tih Zoram mipuite hian I chhut chiang theuh teh ang u.