Zaithiam Katy Perry leh Justin Trudeau te chuan an inkawp tih sawi lo mahse an inzui ngei tih a chiang zel a, Trudeau-a fapa Xav chuan Perry nena an inzawmna a that thu a rawn sawichuak leh hlawl mai.
Kum 18 mi Xav chuan music lamah hian ka thiam ang angin ka tui ve a, hla ka siamte hian Katy entirin, a duhkhawp loh lai leh thlak danglam ngai tur hi min hrilh zung zung thin, ka tan chuan thurawn min petu tha tak a ni, a ti.
Xav hi a hming pum chu Xavier niin, Katy chu khawvel music tiropuitu a nih thu sawiin, ka pa hlimna thlentu a ni bawk a ti a. Engmah hi thlak danglam theih ni tawh lo mahse ka pa hlimna hi a hlu a, hun hlimawm tak hmang thei reng se ka duh, a ti bawk.
Perry hian a pasal hlui Orlando Bloom nen fanu Daisy Dove, kum 4 mi neiin, Trudeau hian a nupui hlui Sophie Gregoire nen fa pathum, Ella-Grace,17 leh Xav leh Hadrian, 12 te an nei hman a ni.
Canada prime minister hlui leh zaithiamte hi an inzui ngawrh viau a, an chungchang hi engmah tarlang ngai lo mahse, an awm dun tam theih nan hunawl an insiam nasain, hun tam zawk hman dun reng an duh niin khawthlang lam media-te chuan an tarlang nasa hle.