US President Donald Trump-a chuan Iran buaina chungchanga inbiakna chu inkhar hnana neih a nih tur thu a sawi a, ‘POINT awmze nei pawl khat chauh’ US chuan a pawm theih a nih thu a sawi bawk a, a bak inbiakna chungchangah hian thu chiang a la sawi lo.
Social media-ah, “Hengte hi INKAHHAI a awm theih nan kan inremna bulpui ber POINT-te a ni a. Chhan tha leh awmze nei tak a ni a, awlsam taka tihbo theih pawh a ni,” tiin a tar lang.
Trump-a hian ABC News-in an kawmna dangah chuan inbiakna hi Zirtawpniah tan a nih a beiseiawm thu leh rang taka thiltih a nih tur thu a sawi bawk.
Pakistani Prime Minister Shehbaz Sharif-a chuan Nilaini khan ram pahnihten chawlhkar hnih chhung inkahhai an pawm hnuah US leh Iranian aiawhte chu inbe turin Zirtawpniah Pakistan-ah an thleng dawn tih a lo sawi tawh bawk.
Tar lan tawh angin February 28 atanga US leh Israel tang dunin Iran an beih tan atanga Middle East-a indona chhuak mekah hian Thawhlehni zan khan US leh Iran chuan chawlhkar hnih inkahhai an puang.
Inkahhai puan a nih hma hian President Trump-a chuan inkahhai tura Iran-in a pawm lohva, Strait of Hormuz a hawn loh bawk chuan zan khat thil thuah nuai chimihah a vau va, hun tiam a pek a liam hma lawkin inremna hi siam a ni.
Inkahhai puang tur hian Pakistan chuan theihtawp a chhuah a, inkahhai chhung hian khawvela tuikawng pawimawh ber zinga mi, Iran-in a khar, Strait of Hormuz chu hawn a ni dawn bawk.