Assam-a assembly inthlan hma ni chiahin Congress party tana thu lawmawm lo tak a thleng a, Udalguri (ST) biala an party candidate, Suren Daimari-a chuan an party atanga a bân thu a puang.
Daimari-a hian party a chhuahsan chhan chu an pawl chhungah thlawpna leh inbiakpawhna tha a awm loh vang a nih thu a sawi.
Daimari-a hian thla hmasaa inthlan chuh tura a hming a thehluh hnuah party-in an kalsan nghal tih sawiin, party hruaitute hnen atangin a campaign-naah kaihhruaina leh sum lama tanpuina a dawn loh thu a sawi.
“Candidate-ah min siam a; mahse, campaign chhung zawng khan hruaitute nen inbiakpawhna reng reng a awm zui lo,” tiin Daimari-a chuan Nilainia a bân hnuah a sawi a, an hruaitu lawkte pawh biak a tum a; mahse, chhanna a dawng ngai lo niin a sawi.
“Inremna a awm lo va, thlawpna leh inkaihhruaina engmah a awm lo,” a ti.
Daimari-a chuan inthlan atanga inhnuhdawh a tumna chu Election Commission of India hnenah a hriattir tawh tih a sawi a; mahse, inthlan thuneitute chuan inhnuhdawh hun hi March 26-a a tawp tawh avangin a tlai tawh hle niin an sawi.
Congress chuan Daimary-a hian chanchinbu mite hnenah an party a chhuahsan thu sawi mah se a bânna hi party-ah a thawn lo niin an sawi a. Assam Congress thupuangtu, Bedabrata Bora chuan, “Official-a party hnena a bânna a thehlut loh avangin engmah kan hre lo va; mahse, kan inbia ang,” a ti.
Assam-ah hian member 126 awmna assembly inthlanah hian Ningani khan mipuiin vote an thlak a, chuhtu mi 722 an awm.
Daimari-a hi Udalguri biala chuhtu pali zinga mi a ni a. A dang pathumte chu United People’s Party Liberal (UPPL) atangin Dipen Boro, Bodoland People’s Front (BPF) atangin Rihon Daimari leh Voter’s Party International (VPI) atangin Unike Basumatary te an ni.