Aizawl Municipal Corporation (AMC) thlan kan hmabak a, party hrang hrangin inthlan campaign pawh an ngawrh ta hle mai. Zingkar atangin chhun zan zawmin in tinah vote zawngin candidate an inpel suau suau a, mawngvawm ba ang maiin candidate te pawhin mutmu tuah hman lovin hun an hmang ta. Karkhat chuang deuh hun a la awm e.
Municipal thlan hi kan nei ta zauh zauh a. Kan thlanchhuah tur hi kum 5 chhung Aizawl khawpui enkawl tur an ni a, kan thlanchhuah sual chuan khawpui hmasawnna a kal chak lo deuh ang a, kan thlan fuh chuan Aizawl hmel ti danglam thei kan thlang dawn a ni.
Hun kal tawh kan thlir let lo thei lova. Kan Municipal Corporation thlanchhuah tawhteah khan kan inchhir nge kan tifuh tih pawh hi mitin in inenlet a tha khawp mai. Tunhma khan party hovin tling thei tura an rin milar tih vel kha an rawn zuar thin. Tam tak chu a tlin pawh an tling mai. Mahse, kan bihchian chuan Municipal Corporation kalphung leh an hnathawh tur engmah hriatna nei lo kan thlan tlin tak an awm nual. Chutih rualin kohhran lama rawngbawltu ni mek thlan tlin pawh an awm nual tawh. Mahse, Municipal Corporation lama an hnathawh erawh danglamna awm lem lo an awm nual bawk.
Kan Municipal Corporation thlan chhuahte hian mipui rawngbawlna lam an khawih ber tur a ni a. Dan leh dun hmanga mipui hmasawnna thlen tura vawrhchhuah an ni. A corporation kalphung leh dan awmsa hmanga an hnathawh tur hi mipui tan a ni tih an hriatchian a ngai. Chutiang mi chu kan vote chhuah tur chu an ni tih hre reng chungin MMF, Congress, ZPM tih hi kan thinlunga dah lian lova vote kan thlak hi mipui hian hre reng ila.
Party ho chu an rawn campaign ang, an tih tur ve reng a ni. Mahse, kan aiawh tur fim taka kan thlan thiam a ngai. He khawvel lemchanna ramah hian lemchang leh a tak thliar thiam hi mipui mawhphurhna a ni.