Mizoram Pradesh Mahila Congress Committee, General Headquaters chuan Ningani khan Tuma Resort-ah Political Training an nei a. He hun hi MPCC Vice President RL Vala leh MPCC Adviser Zodintluanga Ralte ten an hmanpui.
Mahila Hqrs President Zodinliani kaihhruai hun hmanah hian MPCC Vice President RL Valla chuan Mizoramah hmeichhe politician ropui tak tak an lo chhuak tawh a. Politics hi mipa telna tur chauh a ni lova, ram leh hnam tana hnathawk turin hmeichhiate pawhin politics hi an ngaihven a, politics huangchhunga an tel ve a ngai tih a sawi.
Minister hlui, RL Valla chuan tunah hian hmeichhiate tan Congress party-ah hmun a awm tih sawiin AMC-ah ngei pawh hmeichhe seat bakah general seat-ah pawh hmeichhe dintir an neih nual thu a sawi a. Central sorkar hian MLA-ah hmeichhiate tan hmun zuah a kalpui a nih phei chuan hmeichhe mamawhna a sang dawn a. Ram rawngbawlna hi Pathian rawngbawlna a nih thu a sawi bawk.
MPCC Adviser Zodintluanga Ralte pawhin MNF in AMC hi an din anga insawiin, AMC act chu siam ve mah se, Municipal pian tir tumna tak tak a awmlo tih sawiin, “Kum 2008-a Congress sorkar alo pian khan Municipal din anih theih nan a rules duangin theihtawp kan chhuah a. AMC hi Congress kutchhuak liau liau a ni,” a ti.
Minister hlui, Zodintluanga Ralte chuan, “Tun municipal-ah hian Congress hi Aizawl mipuite tan a sorkar ngei a ngai a. ZPM an sorkar a, buhfai man an tito nghal a. Petrol man an tisang a, engkim a to phah,” tiin, AMC-ah ZPM an sorkartir a nih chuan chhiah chi hrang hrang an tipung leh dawn a. Property tax pawh an tipung ngei dawn tih a sawi.