All Mizoram Village Council Association-in Mizoram tana 15th Finance Commission hun chhunga VC-ten Rural Local Body grant Rs. nuai 36,200 an hmu thei vek chu lawmawm an tih thu an sawi.
Ningania Aizawl Press Club-a thu thar lakkhawmtute an kawmnaah All Mizoram VC Association President FP Laikhama chuan VC-ten khawtlang hmasawnna tur atanga 15th Finance Commission-in Mizoram RLB Grants dawn tur a ruahman 2021–2026 chu a sum fai zawngin Rs nuai 36,200 a nih thu a sawi a. 15th FC hnuaia RLB grants sum dawn tawp berna tur hi 15th FC hun chhung ngei, kumin March 28 khan a bo a bang awm lovin Mizoram chuan a dawng kum a, a bo a bang awm lova an hmuh theih nana Mizoram sorkar hmalakna chu fakawm an tih thu sawiin, sorkarin a thuneihna semzai a ram hmasawnna tur a tobul ber thingtlang hmasawnna a ngai pawimawh leh party hrang hrang atanga VC-te pawh thlei bik awm lova an chanvo ang theuh hmu a hmasawnna tur sum rualkhai taka hmuh a ni chu lawmawm an tih thu a sawi.
FP Laikhama chuan December, 2023-a sorkar thar a pian hnuah Directorate of Local Fund Audit & Pensions leh LAD lam ten hma nasa takin an la tih sawiin, sorkar hmasa lama an dawh hman tak loh RLB grants 2nd installment pawh dawn chhunzawm a nih thu leh kumin thlengin an dawn char char thu a sawi a. All Mizoram Village Council Association chuan RLB grants an dawn theihna chhan chu chu sorkarin sum dik tak leh fel taka a enkawl avangte, grants hmuh nana document ngaite chak taka a bawhzui zel vang a nih thu an sawi.