Aizawl: Mizoram Transformation Movement (MTM) chuan ram hruaitu MLA leh Minister te bakah MLA hluiten Mizoram Universal Health Care Scheme (MUHCS) chu tha nia an hria a nih chuan zawm ve ngei se an duh tih an sawi.
Inrinnia an thuchhuahah MTM chuan, ram hruaitu MLA leh Minister te, Ex MLA te hian MUHCS hi a tha hle a an hria anih chuan zawm ve ngei se, damlo mangang leh chhungkaw harsa tam takin an bill theih lohna hospital a awm a ngaih si laia anni’n an duhtawka an lo bill thei hi a dik tawk lo hlein an hriat thu an sawi.
MTM chuan Mizorama private hospital empanelled lo ah te damlo an luhin bill theih lova a awm hi a dik lo va. Mizoram Health Care Society in empanelled hospital list a tih chhuah ah hian deemed empanelled hospital, cashless hman theih lohna, MR bill theihna chauh hospital list a dahah hian Silchar a hospital te, Shillong a private hospital Woodland, Bethany leh Nazareth Hospital te, Guwahati a Downtown Hospital pawh an tel a. Hnam dang private hospital zawka tih theih si Mizoram entreprenuer-ten an siam private hospital a phal a ni ve loh hi a dik lo a, sorkar hian rang takin ngaihtuah tha leh se an duh tih an tar lang.
MTM chuan sorkar hnathawk ten MUHCS awm hma a an duhna hospital-ah an kal a, MR an bill leh mai thin ang khan an duhna leh mamawhna hospital ah kal a, cashless a an kal theih lohna hmunah pawh MR an bill phalsak leh nise an duh tih an sawi a. Pensioner te pawh an phut angin MUHCS 1.0 ang talin dah sak leh nise tha an ti tih an sawi bawk.