MNF party chuan Aizawl Municipal Corporation (AMC) inthlanah sorkarna an chang a nih chuan Aizawl khawpui hawisan an tum lo mai ni lovin, Aizawl hmasawn zawk, changkang zawk leh mipui mimir hrim hrim pawh dinhmun sang zawka hlankai tumin kan inruahman tih an sawi.
Inrinni khan Aizawl Press Club-ah thu thar lakhawmtute kawmin MNF AMC candidate R Lalnunthari (Nunui Rualhleng) chuan, AMC inthlanah sorkarna an chang a nih chuan an hmachhawp hrang hrangte a sawi fiah a. AMC huam chhungah khualzin leh pem lut an pun zel avangin mumal zawka inawpna Aizawlin a neih theih nan Aizawl khawpuia cheng dik takte chhinchhiahna (Population Registration) uluk zawka kalpuiin nau piang, mitthi leh pem lutte chhinchhiah an tum tih a sawi.
Nunui chuan AMC inrelbawlna tha zawk leh chak zawk siam an tum thu te, AMC hnuaia development hnathawh reng reng kut tling leh mawi, belhchian dawl a nih zel theih nan hmalak chhunzawm a nih tur thute, Local Council leh Ward Committee-te mawhphurhna a lo mumal zawk theih nan ruahmanna siam an tum thu te, AMC sorkar chak zawk leh langtlang din chhunzawm tum a nih thute leh thawktu indaih loh vanga hna muang thin tihziaawm a nih theih nan thawktu lak belh an tum thute leh ram leh hnam himna tur leh Mizo sumdawngte tana hamthatna turin AMC Licensing Regulation ennawn a nih tur thute a sawi.
AMC Ward IV MNF Candidate hian Aizawl khawpui veng thenkhat lirthei luh theih lohnaah bawlhhlawh paih dan mumal zawk ruahman a ni dawn tih sawiin, ran vulh leh ran khuahkhirh chungchangah Local Council-te be rawnin mipui zawh tawka hmalak chhunzawm zel a ni dawn tih a sawi bawk.
Zawhna chhangin Nunui hian social media-ah mi mala beihna a tawk nasa tih sawiin, amah hawtute leh amah beitute chu Pathian hmingin a ngaidam vek tih a sawi.
Nunui thu sawi dangte
- Leimin leh lei tlahniam laka a him zawk nan tuihawk luankawr tha zawk leh a khuhna siam belh zel
- Rukru leh misual laka mipuite an him nan leh hnu chhui awlsam zawk nan Local Council area hrang hrangah CCTV a tam thei ang dah belh
- Khawpui faina leh mawina (beautification) lam hawia hmalakna kal mek chhunzawm zel
- Aizawl khawpui kawtchhuahah Aizawl gate mawi taka siam
- Bawlhhlawh paih leh sawngbawl lamah tan lain bawlhhlawh tihral dan mumal leh tha zawka kalpui tum
- Aizawl khawpui ‘Plastic Free City’-a puan tawh chu a hlawhtlin zel theih nan chak leh felfai zawka hmalak chhunzawm
- Septic tank khat tawh tihfai leh ek paihna hmun siam belh te chu an tum.