- Dr. J.T. Vanlalngheta,
Advocate, Life Member, IIPA
Tual chhung ro reltute (rural and urban local bodies) tih tur hmasa ber eng nge ni?
Village Council, local Council leh Municipalities hming te kan hria; an hna thawh tur pawh Constitution 73rd & 74th Amendment Act, 1992, 11th &12th Schedules zul zuia siam, The Mz M Act, 2007 (As am’ded in ’09), 2015 leh Corporation-a hlan kaina dan te pawh kan lo chhiar ve e. Mahse.. .
Ram danpui meuhva ULB & RLB dah a nihna chhan tih hlawhtlin hi a pawimawh ber chu a ni a, chu chu an ti hlawhtling em? An hlen chhuak tha em, tih lam chu tunah kan sawi hman lo vang a, hun danga sawiah dah ila. Tun tumah a bikin ULB thawh tur pawhmawh tam tak sawi lovin, pakhat chauh i’n sawi zui daih teh ang!
Kan Lalpa Isua pian hma, BCE 3250-2750-a India (leh tuna Pakistan ram thenkhat) lo luah hmasatu Indus Valley Civilization/ Harrapan mite khan, tui lian laka an him nan TUI- LUAN-KAWR tha tak tak an siam a; he an hna thawh hi tun thleng hian a hma sawn zawngin khawvel mak tih a la tling; mahse, kum sang tam ral hnuah pawh keini chuan kan la tluk lo hle. Sawrkar (state govt, local self-govt: Municipalities; VC, LC ) kan neih hnu pawh hian heng kan sawrkar neihte quality hi tui-luan-kawr siam lamah chuan a la chhuanawm rih lo hle; chutih laiin, mi nawlpuite chen hian, in leh lo, car tha, furniture tha leh incheina nalh te kan hre fûin, kan nei thei tho si; he lamah chuan kan quality a sang tlang hle; fûr laia in/lei tawlh avanga nunna kan hloh tam tawhzia te hre lo ni awm takin tui luan kawr hian kan ngaih pawimawh–tih tur pawimawh hmasa lama dah a hlawh lo hle thin a ni. Councellor leh Corporator lo ni tawhte khan in ward chhunga tui-luan-kawr zat tlangpui leh a in pawhna laite kha zawt thut che u ila, awlsam takin in chhang thei ang em?
Corporator zawng zawngte hian an bial chhunga kawng sir tui-luan- kawr bakah in leh in inkar tui-luan-kawr te hi hre vek turin map siam sela, a tul hunah, “Chu lai, kha lai, khu lai, khi lai, ” tih kawk zat zat thei turin hriat hneh tum sela, hun eng emawti chhung tal chu enghelh deuh berah neih tum rawh se; tui luan kawr ngaihthah vang hian nunna kan hloh nasat tawhzia hi kan hai der a nih ngawt loh chuan, hna hmasa leh pawimawh berah i nei phawt ang u.
He lam kawnga nunna kan chan tawh loh nan, State Sawrkar leh tual chhung ro reltute hian tui-luan-kawr hi han ât chilh tak tak tawh sela; tunlaia Aizawl DC hma lakna ‘Chhiat rupna laka inven nana tui-luan-kawr leh a kaihhnawih statistic lak khawmna’: Disaster Audit pawh hi mipuiin an dah khah (fill up) anga tha taka hlen chhuah a nih phawt chuan, tuna kan sawi mek thui tak tih hlawhtlinna a ni dawn a, fur laia lei/lung/in tawlh vanga thihna thleng thin hi a awm tawh lo thei hial ang.