- F. Vanlalrochana
VIP ven him dân tur tihte kan han zir hrep a. Black Cat ho zinga lo tel hrep tawhin min han zirtir a. Chutiang chu Khawvel Lalte an ni. An biak mai mai theih loh a, an hmuh mai mai theih hek loh.
Kum sang hnih chuang kal taa Judai rama an khenbeh erawh kha chu Lei leh van lal a ni a. A zuitute pawh, Lehkhathiam lo mi mawl an tih te kha an ni thin. Naupang te, hmeichhe nawi tak tak te, mi chi tin rengin an zui a, a kiangah an awm a.
Khawvel Lalte chu venhim an ngai a, an tân nunna hlu ber ber te hlan a ni zawk thin a, training hau tak ber ber paltlang hnuah heng Lalte venghimtu hi a nih theih chauh thin a, anmahni venhimnan sum tam tak sen ral a ni thin bawk a, chung Lalte chuan Mipuite tan eng ang thil nge an tih tih te, eng thIl tha nge an tih chiah tihte pawh a ngaihtuah theih hle ang.
Lei leh Vana Lalber erawh chuan kan tân a tuar a. Kan zingah a lo cheng a, Mipui zingah a talin a khawsa thin.Mipuite pawhin an tiduhdah hial thin, khawvel Lalte erawh chu an tihdik loh hlekah pawh miin sawi sel se, a sawiseltu chu man an ni thin. He Lal erawh hi chu a thiam loh ni miah lohah thiam loh chan tir a ni.
“Mahse, Enteh Kalvari kawng Lal saw,
Mipui zingah Ka Lalpa ka hmu.”
Kan Khawvel lal te chu In ropui ber berah an cheng a. Thil tha ber ber pek an ni a. Motor tha ber berah silai nena ven an ni thin a. An tan mipuiten an tuar zawk thin. Kha Lal erawh chu,Mite tana chhandam tlei tlak turin kalvari lam a pan ngat ngat mai a ni.
“Aw Ka Lal, i lo kir leh tawh long maw
I hmun tur chu kalvari a ni”
He Lal tluka duhawm hi a awm lo a, he Lal tluka ngainatawm hi a awm hek lo, Mipui zingah an hmuh Lal, chhuan zawng zawng te tana tuartu kha.
Tuipui te, ruahte siamtu khan Ka tui hal a ti a, Thlamuanna petu kha a lungngai a sin.
Ka Lal hmel tluka duhawm hi a awm lo. Hlinglukhum khum hi tuman kan duh lo ang, mahse, Lalpa khan kan tan a khum a.
“Ka Lalpa hi a mawi ber e, Hling lukhumin phuar vel Mahse”
Van Ropui kalsanin kan tan Leiah a lo kal a nih kha, kha Lal kha…
“Lalpan min hmangaihna chu
Van rangkachak ram kalsanin
Sual fate min zawng turin
A tuar Lalpa Isuan”