Dominican Republic hmar lama thla khat chhung zet ruah a sur hnuah tun hnai ni engemaw zat chhung khan Caribbean ramah hian mi 30,000 velin an chenna in chhuahsanin hmun him an pan.
Tual chhung chanchinbute chuan mi pathum an thi tih an tar lang a, heng zingah chuan lui kai tum hmeichhe naupang kum sarih mi, sakawr chunga chuanga kân tum rawlthar kum 19 mi leh khawpuiah nausen hmeichhia, ruah sur vanga an in bang chimin a delh te an ni.
President Luis Abinader-a pisa chuan Thawhtanni khan thuchhuah siamin, “Tun dinhmunah sorkarin a ngaih pawimawh ber chu nunna chhanhim, thil neih hum leh vantlang thil pawimawh hum a ni,” a ti.
Abinader-a hian province panga bakah khawpui chhungah emergency a puang bawk.
A hma ni khan an ram Emergency Operations Centre (COE) Director Juan Manuel Mendez-a chuan thuthar lakhawmtute a kawmnaah mi 30,500 chu hmun himah sawn an nih thu a sawi a, khaw 14 chu pawh theih an nih loh thu leh chenna in 6,100 tui lianin a chim bakah kawngpui leh lei a chhiat thu a sawi.
“Ruah a sur chhunzawm zel dawn a ni,” tiin meteorological institute hotu, Gloria Ceballos-i chuan Thawhtanni khan a sawi a, kartawpa a insiam chak leh hmain a tlahniam hret dawn niin a sawi bawk.
“Hmarchhak lamah hian ruah lo thlen theih tur chhum insiam a la awm reng a ni,” a ti a. “Lei hi a nem tawh a. Ram chhung hmun thenkhatah ni 45 vel ruah a surna pawh a awm tawh a ni,” a ti.
US bula awm Puerto Rico-ah chuan thuneitute chuan Thawhtanni tlai lam (India-a Thawhlehni khaw var hma)ah ruah nasa tak leh thlipui tleh tlehin tui lian a thlen a, buaina nasa tak erawh a thleng lo nia hriat a ni.