Mizoram sorkar leh Hmar People’s Convention-Democratic (Lalhmingthanga Sanate’s Faction) chuan Thawhlehni khan Vengpui Community Hall, Sakawrdaiah Memorandum of Settlement an ziak fel.
Memorandum of Settlement-ah hian Mizoram sorkar aiawhin Mizoram Home Department Secretary David Lalthantluanga’n hming a ziak a. HPC-D (LF) aiawhin an president, Lalhmingthanga Sanate-in hming a ziak.
Mizoram sorkar chuan Mizoram chhunga ralthuam keng chi bil hel pawl la awm chhun nia hriat HPC-D (LF) hi kum 2024 laihawl atangin a dawr tan a, September 20, 2024 khan Silchar Mizoram House-ah inbiakna hmasa ber neih a ni a, boruak tha tak hnuaiah inthlah a ni a. October 10, 2025-ah Assembly Speaker Lalbiakzama pisaah inbiak vawi hnihna neih a ni a, hetah hian an thil phut (charter of demand) an pharh a, tha takin sawiho a ni.
Hemi hnu hian home minister kaihhruai committee lian din a ni a, October 28, 2025 khan thutkhawm a ni a, inbiakna neih tawh dan thlirho niin HPC-D (LF) demand sawiho a nih bakah Mizoram sorkar duh dante sawi fel a ni.
December 1, 2025 khan Aijal Club-ah inbiak vawi thumna neih leh a ni a, Mizoram sorkar duh dante hrilh fiah a ni a. December 2, 2025-ah HPC-D (LF) hian Mizoram sorkar duh dan an pawm thu leh anmahni lam thil phut thenkhat ziakin home department-ah an thlen a, official level-ah indawr chhunzawm zel niin March 30, 2026-ah Adviser to CM (Political) Lalmuanpuia Punte, MLA, pisaah inbiakna hnuhnung ber neih a ni a, engkim a tul tur ang ang sawiho niin April 9, 2026 khan home minister hova official kalkhawmten an thirho hnuah ruahmanna siam a ni a, inremna ziah fel a ni thei ta a ni.
Memorandum of Settlement ziahna hun hi Adviser to Chief Minister (Political) Lalmuanpuia Punte leh Rodingliana Chawngthu, DIG (Northern Range) te bakah Dr. Chaltonlien Amo, ex-MLA, Manipur, Sinlung Hills Council Member-te, Village Council Sakawrdai member-te, YMA Tuisual Group hruaitute, Joint YMA Sakawrdai hruaitute, Hmar Inpui (Mizoram Region) hruaitute, Hmar Students’ Association hruaitute bakah Mizoram sorkar official ten an hmanpui a ni.
Ruahman lawk dan chuan HPC-D (LF) mi leh sa 43-te tan Mizoram sorkar chuan April 30, 2026 hian CTI, Sesawng-ah Laying of Arms Ceremony (silai tun inkhawm) a buatsaih ang.