Aizawl: MNF General Secretary Dr Lalrinzuali chuan ZPM kaihhruai Mizoram sorkarin Mizoram Universal Health Care Scheme (MUHCS) a kalpui danah zep ruk leh thup a tam tih a sawi.
Nilainia Aizawl Press Club-a thu thar thehdarhtute a kawmnaah MNF Gen. Secy chuan sorkarin MUHCS a kalpui danah zep ruk leh thup a tam thu leh health care scheme dangin a huam ve loh, mipui nawlpuite tan ban phak loh a nih avangin tuna kalpui mek dan chu awmze nei lo niin a sawi a. “A hming an phuah mawi ang chiah hian thup then nei lo, mipui rilru thianghlimte bumna tel lo, mi tin tana hamthatna huapzo health care tak tak hi min pe ngei turin kan phut tlat a ni,” a ti.
Dr Lalrinzuali chuan MUHCS chungchangah kohhran inrawlh ngai hi a hlawhchhamzia lanna a ni tih sawiin, “Health scheme engmah nei ve lo, a mamawhtu tak tak, contributory beneficiary inziak lut an tlem em chhan hi inziah luh man a san vang a ni a, a hniam ber pawh Rs. 2,500 chawi ngai a nih avangin mipui nawlpui ban phak a ni lo va, kohhran hote hialin an mi leh sa, inziah luhna nei lote puih an inhuam thu an auchhuahpui hial hi MUHCS hlawhchhamzia lanna, sorkar tan thil zahthlak tak a ni,” a ti.
Hetihlaia ‘kohhran hote pawhin tha min tihpui’ ti zawnga sorkar hotuten mipui hmaa an sawi duh maite phei hi chu mi harsa zawkte dinhmun an hriatpui phak lohzia lanna leh mi rethei zawkte hmusitna lam a hawi zawk a ni tih a sawi.
Dr. Lalrinzuali chuan sorkar hian langtlang takin indawrna a kalpui lo a, phai lam leh Mizoram chhung ngeiah pawh damdawi in thenkhat chu a ruka inremna siampuiin an inremna chu assembly house-ah meuh pawh MLA-ten an zawt chhuak zo lo tih a sawi bawk.