MPCC Secretary Rosiamngheta chuan Aizawl Municipal Corporation (AMC) inthlanah Congress an sorkar chuan ZPM corporator-te motion puh luh, Aizawl khawpuia ran vulh khuahkhirhna dan an ennawn dawn tih a sawi.
AMC corporator hlui, Rosiamngheta hian nimin khan Aizawl Press Club-ah thu thar thehdarhtute a kawm a, MNF kaihhruai AMC sorkarin Aizawl khawpui chhunga ran vulh khap tlatna dan a lo siam hi ZPM corporator-te motion put luh a nih thu sawiin, “ZPM motion put luh avanga ran vulh duh ngawih ngawih chhungkaw tam takten harsatna tawk mek kan ni tih hi Aizawl mipuiten kan hriat a tul,” a ti.
Rosiamngheta chuan ran vulh khuahkhirhna dan hi zangkhai zawk leh awmze nei zawka hman a nih theih nan an ennawn dawn tih sawiin, “Aizawl khawpuiah hian a veng azirin ran vulh remchanna hmun tam tak a la awm tih Congress party chuan hriain AMC area zawng zawnga ran vulh khap burna dan khauh tak hi mipuite tana tangkai turin kan siam tha dawn,” a ti.
Rosiamngheta chuan municipal sorkar chu state sorkarin a duh duha a thunun theih loh, mahnia rorelna leh thuneihna nei a nih thu a sawi a. Aizawl khawpui nun awmze neia a subject chan hmanga enkawl mai tur a ni a, party thenkhatin state sorkar lai agency pakhat deuhthaw ang maia an ngai chu a dik lo tih a sawi.
MPCC secretary chuan AMC inthlan lo awm turah Congress candidate-te chu tawnhriat nei an ni tih a sawi a. Rorelna hi tlachawp leh dapchawp taka tih tur a ni lo va, ngaihtuahna fim hmanga thutlukna dik siamna hmun tur a nih anga rorel tur chuan Congress party-te chuan mi lar emaw ngawt an zawn loh thu sawiin, AMC Election 2026-ah hian khawtlang rorelna lama sulhnu nei tha leh inhmang mekte candidate atan an theh chhuak tih a sawi.