Indian parliament-a rorelna in hniam zawkah hmeichhe tana seat hmun thuma thena hmun khat (33%) hauhsakna tura bill chu a tlang zo ta lo va, he mi rual hian bial ramri rin tharna tur rawtna hnuh kir a ni.
Dan tihdanglamna tur bill hi kum 1947-a British rorelna laka an indan hnua India-a politics kalphung tihdanglamna langsar ber pawl tura ngaih a ni a; mahse, ni hnih chhung sorkar leh eptu MP-ten an sawiho hnuah Zirtawpni zan khan bukna a paltlang zo ta lo a ni.
Parliament leh state rorelna ina hmeichhiate tan seat 33% hauhna tur hi hmeichhiate aiawh tlem tê an awm rengna kalphung thlaka tihpun tumna a ni.
Hmeichhiate tana chanvo hauhsakna hi ram puma bial ramri siam thar leh tura ruahmanna nen a inzawm a, hei hi inhnialna lian tak pawh a ni.
Hmeichhe aiawhte tihpunna tur bik hi chu party hrang hrangte pawhin tha an ti a; mahse, eptu party-te chuan bial ramri siam that leh parliament-a member tam zawk awmtirna chuan Prime Minister Narendra Modi-a kaihhruai BJP tana hlawk theihna tur a awm theia an ngaih avangin an duh lo.
Bill pahnih sawiho tur hian Modi-a sorkar chuan ni thum chhung awh parliament special session a ko va, Ningani khan tanin bill hi pharh nghal a ni a. Dan thar tur hi MP hmun thuma thena hmun hnihin an pawmpui a ngai a. Hmeichhe tana chanvo hauhsakna tur chu sawiho hnua bukna a paltlang zo lo va, sorkar chuan ramri rin that a rawtna bill a hnuk kir zui ta bawk a ni.
Ramri rin that hi pawm a nih chuan kum 2029-a parliament inthlanpui neih leh turah chuan rorelna in hniam zawk, Lok Sabha-a seat awm zat chu 543 atangin 850 velah a pung tawh dawn a ni.
Eptu pawl lian tak takte chuan he bill hi an dodal a, kum 2011 chhiarpui behchhana bial siam a nih chuan ram bial thang chak tak ni mek, hmarchhak state aiawhten politic-ah theihna an neih sang thut ang a, hetih lai hian bial neih zat leh thuneihna kawngah chhim lam state-te an chanvo a chhe sawt dawn niin an sawi a. Ramri rin that a nih chuan hmarchhak lama thlawptu ngah, Modi-a party tan hlawkna a thlen thei bik dawn niin an sawi bawk.
Sorkar chuan eptute ngaihdan hi a hnawl a, ram pumah inrualkhai taka thil kalpui a nih theih nan state zawng zawngah bial hi 50%-a tihpunna tur ruahmanna siam a nih tur thu a sawi a; mahse, sawiseltute chuan rawtnaah sorkar thil sawi hi chiang taka ziah lan a ni lo tih an sawi ve thung.
Bill buk tura ruahman a nih hmain Modi-a chuan X-ah sorkarin ngaihtuahna leh ‘dan siam chungchanga ngaihdan dik lo awmte chu thu dik leh a nihna ang tak hmangin a hmachhawn vek’ tih a tar lang.
Eptu hruaitute rilru a hmin chuang lo va. Congress party hruaitu, Rahul Gandhi-a chuan he thil hi ‘India electoral map thlak danglam tumna’ tiin a sawi.
Sorkar chuan bill an pharh tlang turin rorel lai, BJP-in anmahni bilin MP an ngah tawk bik lo va, party tenau leh eptu pawl thenkhat thlawp tura an hmin turin an bei nasa hle.
Zirtawpni zana bill buknaah hian tlang tura thlawptu 352 neih ngaiah a thlawp zawngin 230 tlain a duh lo lamah 298 a tla ta a ni.
Sorkar chuan eptute duh loh ber, bial ramri rin that tur rawtnaah hian tuna ramri hi kum 1971 chhiarpui behchhan a nih thu leh mihring an pung a, an party hamthatna tur bik ni lovin, rin that a hun niin an sawi.
Bill hi pawmin a taka hman a nih chuan Lok Sabha-a MP awm zat chu 55% vela pungin 850 an ni tawh dawn a. State rorelna ina member awm zat pawh a pung dawn a, kum 2029-a parliament inthlanpui neih leh turah hman tan tura rawt a ni.
Hmeichhe tana seat hauhna tur hi kum 2023-a pawm a ni tawh a; mahse, chhiarpui neih hmabak nena inkungkaih avangin kum 2029 inthlan hnu lamah chauh a hman tak tak a nih a rinawm chuang lo.
Tunah hian parliament hian hmeichhiate tan seat a hauhsak a ni lo va, vote nei mi maktaduai 968 zinga a chanve vel an ni thung a. Lok Sabha-a member zinga 14% chauh an ni a, Rajya Sabha-ah 17% chauh an ni a. State hrang hrang rorelna ina member 10% vel chauh hmeichhia an ni bawk.