Khawvel hmuh chak leh ennawm ropui ber tih hiala sawi thin world cup a hnai zel a, FIFA lam pawh an awm mai mai bik lo, mipuite hipna tur kawng an dap nasa hle.
Tum danga tih ngai loh ang takin, July 19 a MetLife Stadium, New Jersey-a final khelh a nih hunah first half chawlh laiin show a awm dawn a, heta zai tur hian Shakira, Madonna leh Korean band hlawhtling BTS te chu tihchian an nih tawh thu an sawi.
Ram pathum inthlen tawm turah hian a khuhhawnna ram pathumah theuh zaithiam tak tak an inlan dawn tih sawichian a ni tawh bawk a, FIFA chuan an sum hmuhte hi FIFA Global Citizen Education Fund atana hman tur anih thu sawiin, naupangte chu zirna leh football kaihkawp chunga kuangkuah an tum ber a nih thu an sawi a ni.
Kumin world cup official hla hi Shakira sak ‘Dai Dai’ tih a ni dawn a, a buatsaihtu lam chuan thawhpui loh theih loh a nih thu sawiin, hun hmasa lama world cup hla hrang hrang khawvel huapa lo larpui tawh a nih avangin an duhthusam mi a nih thu an lo sawi tawh a ni.
Ziah tawh thin angin kumin world cup hi ram pathum – USA, Canada leh Mexico te an inthlen tawm dawn a, final chu US-ah khelin, a hmawr bawk a ni dawn a ni.