Aizawl: Mizoram Police training hmunpui pawimawh, Police Training School (PTS), Thenzawl-ah Ningani khan hmasawnna ruhrel thar hrang hrangte Home Minister K. Sapdanga’n khuallian niin a hawng.
Heng hmasawnna thar a hawnte — PTS Gate pui, Digital Lab, Indoor Gymnasium leh Indoor Firearms Training Simulator-te hi Assistance to States & UTs for Modernisation of Police (ASUMP) Scheme kaltlanga Mizoram sorkar puihnaa tihhlawhtlin a ni.
Hawnna inkhawmah Home Minister chuan Police Department-in ‘Year of Discipline’ programme an kalpui mek chu heng hmalakna tharte hian nasa taka a tanpui a beisei thu a sawi a. “Police hnaah discipline, professional conduct leh physical fitness-te a pawimawh ber a, heng hmanraw tharte hian PTS-a training standard a tihsan lehzual ka beisei a ni,” a ti.
K. Sapdanga chuan 70th Batch Recruit Constable trainees-te chu recruitment process dik leh langtlang taka tling an nih thu sawiin, Mizoram tana police force professional leh thiam tak an nih ngei a beisei thu a sawi bawk.
PTS Main Gate thar hi sum tlemte hmanga sak a ni a. Mi dang ruai lova PTS-a thawkte leh training laiten anmahni kutchhuak liau liauva an sak a ni a. Police training tih tunlai (modernize) zelna atan Digital Lab., computer set 20 leng neih thar te, silai kah zirna Firearms Training Simulator, AK-47, INSAS leh Glock pistol-te a rualin a kah (simulate) theihna leh building awmsa chu siam tharin, Indoor Gymnasium bungraw changkang tak tak dah tharte a ni.