Aizawl: Manipur-a kohhran hruaitu pathum rawng taka thah an nih chungchangah pawl leh kohhran hrang hrangin tawrhpuina leh demna thu chhuah an siam.
May 3 khan Manipur-ah Zo hnahthlak pastor pathum kahhlum an ni a, pawikhawihtute hi chiang faka hriat a la ni lo.
Churachanpur atanga Kangpokpi pana an haw kawngah Thadou Baptist Association India (TBAI) hruaitute chu Kangpokpi district an thlen hnu, Kotzim leh Kotlen khaw inkarah ralthuam lek pawlten an lambun a, thu dawn danin pastor pathum – Rev Dr Vumthang Sitlhou (TBAI president), Rev Kaigoulun Lhouvum (TBAI secretary) leh Rev Paogoulen Sitlhou te an thi a, mi dang paliin hliam an tuar a ni.
TBAI hruaitute hi Kangpokpi atangin Churachandpur-ah Manipur Baptist Convention-ah an tel a, an haw lamah vanduaina an tawk ta a ni.
Thil thlen hun tak hi hriat a ni lo a, mipui chuan chawhma dar 10.30 velah an hria tih thu dawn a ni. Pawikhawihtute hi hriat a ni rih lo.
Central YMA chuan mi pawisawi lo leh sakhaw hruaitute chunga hetiang thil a thleng hi hriathiam har an tih thu tar langin he thil thlenga mawhphurtuten an phu tawk hremna an hmuh ngei nan sorkar laipui chu hma la turin an ngen a. He thil thleng hian Manipur-a Zofate himna nasa takin a khawih tih tar langin hnam hrang hrang inkara remna leh muanna awm chu an duh ber a nih thu an sawi.
BJP Mizoram State President Dr. K. Beichhua, MLA pawhin demna thu chhuahin Manipur sorkar chu mi sualte man chhuak vat turin a phut.
BJP Mizoram President chuan, “Mi sual thil tih vanga pawisawi loten nunna hlu tak an chân hi a pawi kan tiin, an kalsan tak an chhungte BJP Mizoram chuan kan tawrhpui takzet a ni,” a ti.
Dr. K. Beichhua chuan pastor-te rawng taka thattute hi Manipur sorkarin a hrem ngei a phut thu sawiin, “India ram kan nih anga zalen taka kan nun hona tibawrhbang thinte hi kan do tlat a ni,” tiin, BJP Mizoram chuan hliam tuar mi palite pawh Pathian zarah an that chhuah leh thuai an beisei thu a sawi bawk.
Zo Global Network (ZGN) pawhin Manipur-a kohhran hruaitu pathum rawng taka thah an ni chu pawi an tih thu sawiin, na takin an dem thu an chhuah.
ZGN (Chin-Kuki-Mizo-Zomi Umbrella Organisation) chuan heng kohhran hruaitu thite hi hruaitu satliah mai ni lovin Manipur-a remna leh muanna a awm theihna atana theihtawp chhuahtu an nihna a tar lang a. He inlambunna rapthlak tak hi rilru natthlak an tih thu an sawi a. He pawikhawihna thlentirtu mi sualte hi a rang thei ang bera chhuichhuaka an phu tawk hremna na thei ang ber pe turin thuneitute an phut a. Nunna chânte chhungkaw hnenah tawrhpui thu sawiin hliam tuarte tan Pathian awmpuina an dil pui bawk.
Heng bakah Mizoram Presbyterian Church, Council of Churches in Mizoram (CCM), Mizoram Baptist Kohhran, ZPM, MPCC leh ZORO te bakah pawl hrang hrangin Manipur-a thil thleng chungchangah demna leh tawrhpuina thuchhuah an siam a ni.