Kum 20 hnuah Mizoramah Special Intensive Revision (SIR) neih a ni dawn a, hemi atan hian in tin tlawh chhuah a nih tur thu Mizoram Chief Electoral Officer (CEO) Dr Lalrozama’n a puang.
Ningani khan Aizawl Press Club-ah thu thar thehdarhtute hmaah puangin Mizoram CEO chuan Election Commission of India (ECI) duh dan angin Mizoram tiamin state 16 leh UT pathumah electoral roll ennawnna thuk zawk, Special Intensive Revision (SIR) neih a nih tur thu a puang a. SIR hi Mizoram chu phase thumnaah awmin hemi hi then tet leh niin Mizoram rual hian Orissa, Sikkim leh Manipur-ah kalpui tur a ni tih a sawi a, “He hmalakna hi kalphung pangngai (summary revision) ang ni lovin, a thuk leh a rintlak zawk siamna tur a ni,” a ti.
Dr Lalrozama chuan BLO-ten enumeration form kengin May 30–June 28, 2026 chhungin in tin an tlawh chhuak dawn a. District tin pawh hrilh an ni tawh a. Form submit lote chu draft roll-ah an chuang dawn lo tih a sawi a. Draft electoral roll hi July 5, 2026-ah tlangzarh a ni dawn a, siam that ngai leh ennawn ngaite hi July 5–August 4, 2026 chhunga neih tur niin July 5–September 2, 2026 inkarah chin fel vek tur a ni a. Final Electoral Roll hi September 6, 2026-ah tihchhuah a nih tur thu a sawi.
Mizoram CEO chuan kum 2005 Intensive Revision Roll leh kum 2025 E-Roll te enmil (mapping) a ni dawn a, tuna tlingte leh an thlahte (progeny) thlunzawm an ni ang a. Mapping hi 80.37% kalpui tawh a nih thu a sawi a. Kum 2005-ah voter 5,59,123 an awm a, kum 2025-ah 8,75,004 an awm thung a. Mahni hming leh thlahte (self and progeny) mapping kalpui tawh zat chu 80.37% a ni mek tih a sawi bawk.
CEO chuan mipuite chu BLO-ten in an tlawh hunah lo awm hram tura ngenin, “Tun tum hi roll thar hlak siamna a nih avangin voter-te kan ngaih pawimawh a ngai hle a ni,” a ti.
Dr Lalrozama sawi danin he hmalakna rintlak leh langtlang taka kalpui a nih theih nan political party-te pawh Block Level Agent (BLA) ruat tura ngen an ni a. Tunah hian party hrang hrang atangin BLA 3,430 an awm tawh.
SIR neih hnuhnun ber, kum 2005-ah voter 5,59,123 an awm a, kum 2025-ah 8,75,004 an awm thung.